ಚೀನ ವಿವಿಗಳಲ್ಲಿ ವೈದ್ಯ ಕೋರ್ಸ್‌ ಕಷ್ಟ: ಬೀಜಿಂಗ್‌ನಲ್ಲಿರುವ ಭಾರತದ ರಾಯಭಾರ ಕಚೇರಿ ಸುತ್ತೋಲೆ

ಬೀಜಿಂಗ್‌: ಚೀನದ ವಿವಿಗಳಲ್ಲಿ ಎಂಬಿಬಿಎಸ್‌ ಕಲಿಯಲು ತೆರಳುವ ವಿದ್ಯಾರ್ಥಿಗಳಿಗೆ ಎಚ್ಚರಿಕೆಯ ಮಾರ್ಗಸೂಚಿಯನ್ನು ಬೀಜಿಂಗ್‌ನಲ್ಲಿ ಇರುವ ದೇಶದ ರಾಯಭಾರ ಕಚೇರಿ ಭಾನುವಾರ ಬಿಡುಗಡೆ ಮಾಡಿದೆ. ಅದರಲ್ಲಿ ಭಾರತೀಯ ವಿದ್ಯಾರ್ಥಿಗಳು ಎದುರಿಸುವ ಸಮಸ್ಯೆಗಳನ್ನು ಅದರಲ್ಲಿ ವಿವರಿಸಲಾಗಿದೆ.

2015-21ರ ಅವಧಿಯಲ್ಲಿ ಚೀನಾದಲ್ಲಿ ವೈದ್ಯಕೀಯ ಪದವಿ ಪಡೆದ ಭಾರತೀಯರಲ್ಲಿ ಕೇವಲ ಶೇ.16 ವೈದ್ಯರು ಮಾತ್ರ ಭಾರತದಲ್ಲಿ ಅಭ್ಯಾಸಕ್ಕೆ ಅವಕಾಶ ಪಡೆದಿದ್ದಾರೆ. ಇದೇ ಅವಧಿಯಲ್ಲಿ ಭಾರತೀಯ ವೈದ್ಯಕೀಯ ಮಂಡಳಿಯ ವಿದೇಶಿ ವೈದ್ಯಕೀಯ ಪದವೀಧರರ(ಎಫ್ಎಂಜಿ) ಪರೀಕ್ಷೆಯನ್ನು 40,417 ವಿದ್ಯಾರ್ಥಿಗಳು ಬರೆದಿದ್ದು, ಅದರಲ್ಲಿ ಕೇವಲ 6,387 ವಿದ್ಯಾರ್ಥಿಗಳು ತೇರ್ಗಡೆ ಹೊಂದಿದ್ದಾರೆ ಎಂದು ಮಾರ್ಗಸೂಚಿಯಲ್ಲಿ ವಿವರಿಸಲಾಗಿದೆ.

ಚೀನದಲ್ಲಿ ವಿದೇಶಿ ವಿದ್ಯಾರ್ಥಿಗಳಿಗೆ 5 ವರ್ಷದ ವೈದ್ಯಕೀಯ ಪದವಿ ಮತ್ತು 1 ವರ್ಷ ಅಭ್ಯಾಸ ನಡೆಸಲು ಚೀನಾ ಸರ್ಕಾರವೇ 45 ವೈದ್ಯಕೀಯ ಕಾಲೇಜುಗಳನ್ನು ಗುರುತಿಸಿದೆ. ಈ ಕಾಲೇಜುಗಳನ್ನು ಹೊರತುಪಡಿಸಿ ಬೇರೆ ಕಾಲೇಜುಗಳಿಗೆ ಸೇರುವಂತಿಲ್ಲ ಎಂದು ವಿದ್ಯಾರ್ಥಿಗಳಿಗೆ ಎಚ್ಚರಿಸಲಾಗಿದೆ.

ಭಾಷೆ ಕಲಿಕೆ ಕಡ್ಡಾಯ:

ಚೀನದ ಕಾಲೇಜಿನಲ್ಲಿ ವಿದ್ಯಾಭ್ಯಾಸ ಮಾಡಬೇಕೆಂದರೆ ಪ್ಯುಟೋಂಗುವಾ ಭಾಷೆ ಕಲಿಯುವುದು ಕಡ್ಡಾಯವಾಗಿದೆ. ಒಂದು ವೇಳೆ ವಿದ್ಯಾರ್ಥಿಗಳು ಭಾಷೆಯಲ್ಲಿ ಕೌಶಲ್ಯ ತೋರಿಸದೇ ಹೋದರೆ ಅವರಿಗೆ ವೈದ್ಯಕೀಯ ಪದವಿ ಕೊಡಲಾಗುವುದಿಲ್ಲ ಎಂದು ಎಚ್ಚರಿಸಲಾಗಿದೆ.

ಕಳೆದ ಎರಡು ವರ್ಷಗಳಿಂದ ಚೀನ ವೀಸಾಗಳು ನಿಷೇಧವಾಗಿರುವ ಹಿನ್ನೆಲೆ ಚೀನದಲ್ಲಿ ವೈದ್ಯಕೀಯ ವಿದ್ಯಾಭ್ಯಾಸ ನಡೆಸುತ್ತಿದ್ದ ವಿದ್ಯಾರ್ಥಿಗಳು ಭಾರತದಲ್ಲೇ ಇರುವಂತಾಗಿದೆ. ಚೀನ ಕೆಲವು ವಿದ್ಯಾರ್ಥಿಗಳಿಗೆ ವೀಸಾ ಕೊಡಲು ಆರಂಭಿಸಿದೆಯಾದರೂ ಚೀನಕ್ಕೆ ನೇರವಾಗಿ ವಿಮಾನ ಸಂಪರ್ಕ ಇನ್ನೂ ಆರಂಭವಾಗದ ಹಿನ್ನೆಲೆಯಲ್ಲಿ  ವಿದ್ಯಾರ್ಥಿಗಳು ಸಂಕಷ್ಟದಲ್ಲಿದ್ದಾರೆ.