ಇನ್ನು ಕಾಶ್ಮೀರದ ಸುಂದರ ಯುವತಿಯನ್ನು ಮದುವೆಯಾಗಬಹುದು! ಬಿಜೆಪಿ MLA ಮಾತು ವೈರಲ್

ಉತ್ತರಪ್ರದೇಶ: ಜಮ್ಮು-ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ಕಲ್ಪಿಸಿದ್ದ ಆರ್ಟಿಕಲ್ 370ನೇ ವಿಧಿಯನ್ನು ರದ್ದುಗೊಳಿಸಿದ ಹಿನ್ನೆಲೆಯಲ್ಲಿ ಇನ್ಮುಂದೆ ಕಾಶ್ಮೀರದ ಸುಂದರ ಹುಡುಗಿಯರನ್ನು ಮದುವೆಯಾಗಬಹುದು. ಬಿಜೆಪಿಯ ಅವಿವಾಹಿತ ಯುವಕರು ಕಾಶ್ಮೀರಕ್ಕೆ ಹೋಗಿ, ಜಾಗ ಖರೀದಿಸಿ ಅಲ್ಲಿಯೇ ಮದುವೆಯಾಗಬಹುದು…ಇದು ಉತ್ತರಪ್ರದೇಶದ ಮುಝಾಫರ್ ನಗರದ ಬಿಜೆಪಿ ಶಾಸಕ ವಿಕ್ರಮ್ ಸೈನಿ ನೀಡಿರುವ ಸಲಹೆ!

ವಿಕ್ರಮ್ ಸೈನಿ ನೀಡಿರುವ ಹೇಳಿಕೆಯ ವೀಡಿಯೋ ತುಣುಕು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಜಮ್ಮು-ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನವನ್ನು ರದ್ದುಗೊಳಿಸಿರುವ ಕೇಂದ್ರದ ನಿರ್ಧಾರ ಬೆಂಬಲಿಸಿ ಮಂಗಳವಾರ ಆಯೋಜಿಸಿದ್ದ ಸಂಭ್ರಮ ಸಮಾರಂಭದಲ್ಲಿ ಶಾಸಕ ವಿಕ್ರಮ ಈ ರೀತಿ ಹೇಳಿಕೆ ನೀಡಿರುವುದಾಗಿ ವರದಿ ತಿಳಿಸಿದೆ.

ಬಿಜೆಪಿ ಕಾರ್ಯಕರ್ತರು ತುಂಬಾ ಸಂಭ್ರಮಗೊಂಡಿದ್ದಾರೆ. ಯಾರು ಅವಿವಾಹಿತ ಯುವಕರಿದ್ದಾರೋ..ನೀವು ಕಾಶ್ಮೀರಿ ಹುಡುಗಿಯರನ್ನು ಮದುವೆಯಾಗಬಹುದು. ಈಗ ಯಾವ ಸಮಸ್ಯೆಯೂ ಉಂಟಾಗುವುದಿಲ್ಲ. ಈ ಮೊದಲು ತುಂಬಾ ಸಮಸ್ಯೆಯಾಗುತ್ತಿತ್ತು ಎಂದು ಹೇಳಿರುವುದು ವೀಡಿಯೋದಲ್ಲಿ ದಾಖಲಾಗಿದೆ.

ಒಂದು ವೇಳೆ ಕಾಶ್ಮೀರದ ಯುವತಿ ಉತ್ತರಪ್ರದೇಶದ ಯುವಕನನ್ನು ಮದುವೆಯಾಗಿದ್ದರೆ ಆಕೆಯ ನಾಗರಿಕತ್ವ ರದ್ದಾಗುತ್ತಿತ್ತು. 370ರಿಂದಾಗಿ ಭಾರತ ಮತ್ತು ಕಾಶ್ಮೀರಕ್ಕೆ ಬೇರೆ ನಾಗರಿಕತ್ವ ಇತ್ತು ಎಂದು ತಿಳಿಸಿದ್ದರು.