ಮಾರ್ಕೆಟ್‌ ಕಾಮಗಾರಿ ಮಣ್ಣು ರಸ್ತೆಗೆ: ಸಾರ್ವಜನಿಕರ ಆಕ್ಷೇಪ

ಸುರತ್ಕಲ್‌ : ಇಲ್ಲಿ ಬಹು ಕೋಟಿ ವೆಚ್ಚದ ಮಾರುಕಟ್ಟೆ ಕಾಮಗಾರಿ ನಡೆಯುತ್ತಿದ್ದು, ಟಿಪ್ಪರ್‌ ಮೂಲಕ ಮಣ್ಣು ಸಾಗಿಸುವಾಗ ಹೆದ್ದಾರಿ ಮೇಲೆ ಬೀಳುತ್ತಿದ್ದು ತತ್‌ಕ್ಷಣ ಸುರಕ್ಷಾ ಕ್ರಮ ಅನುಸರಿಸಬೇಕು ಎಂದು ರಿಕ್ಷಾ ಚಾಲಕರು, ಸಾರ್ವಜನಿಕರು ಆಗ್ರಹಿಸಿದ ಘಟನೆ ಶನಿವಾರ ನಡೆಯಿತು.

ಲಾರಿಯನ್ನು ತಡೆದು ಚಾಲಕರಿಗೆ ಮಣ್ಣು ರಸ್ತೆಗೆ ಬೀಳದಂತೆ ಪ್ಲಾಸ್ಟಿಕ್‌ ಹಾಕಿ ಸಾಗಿಸುವಂತೆ ಆಪದ್ಭಾಂದವ ಸಮಾಜ ಸೇವಾ ಸಂಸ್ಥೆಯ ಉಮೇಶ್‌ ದೇವಾಡಿಗ ಇಡ್ಯಾ ಆಗ್ರಹಿಸಿದರು. ರಸ್ತೆಯ ಮೇಲೆ ಬಿದ್ದು ಹಂಪ್‌ನಂತಾಗಿದ್ದ ಮಣ್ಣನ್ನು ಸ್ವತಃ ರಿಕ್ಷಾ ಚಾಲಕರು ತೆರವುಗೊಳಿಸಿ, ಗುತ್ತಿಗೆದಾರರರು ಧೂಳು ಪಸರಿಸದಂತೆ ನೀರು ಚಿಮುಕಿಸಿದರು. ಮಂಗಳೂರು ಉತ್ತರ ಸಂಚಾರಿ ಠಾಣಾ ಪೊಲೀಸರು ಆಗಮಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸಂಬಂಧಪಟ್ಟವರಿಗೆ ಸೂಚಿಸಿದರು.