ಮಣಿಪುರದಲ್ಲಿ ಬಿಜೆಪಿಗೆ ತಲೆನೋವು ಸೃಷ್ಟಿಸಿದ ಅಫಸ್ಪಾ

ಮಣಿಪುರ :ನಾಗಾಲ್ಯಾಂಡ್‌ನಲ್ಲಿ ಸಾರ್ವಜನಿಕರಿಂದ ತೀವ್ರ ವಿರೋಧ ವ್ಯಕ್ತಕ್ಕೆ ಕಾರಣವಾಗಿರುವ ಸಶಸ್ತ್ರ ಪಡೆಗಳ ವಿಶೇಷಾಧಿಕಾರ ಕಾಯಿದೆ (ಅಫ್‌ಸ್ಪಾ ) ವಿರುದ್ಧ ಆಕ್ಷೇಪ ವ್ಯಕ್ತವಾಗುತ್ತಿರುವುದು ಮಣಿಪುರದಲ್ಲೂ ಬಿಜೆಪಿಗೆ ಭಾರಿ ತಲೆನೋವು ಸೃಷ್ಟಿಸಿದೆ.

ರಾಜಧಾನಿ ಇಂಫಾಲ್ ಹೊರತುಪಡಿಸಿ ಮಣಿಪುರದ ಎಲ್ಲ ಜಿಲ್ಲೆಗಳಿಗೂ ಈ ಕಾಯಿದೆ ಅನ್ವಯವಾಗುತ್ತಿದೆ. ಅಫ್‌ಸ್ಪಾ ಕೈ ಬಿಡುವಂತೆ ಮಣಿಪುರದ ನಾಗರಿಕ ಸಂಘಟನೆಗಳು ಕಳೆದ ಐದು ವರ್ಷದಿಂದಲೂ ಹೋರಾಟ ನಡೆಸುತ್ತಿವೆ. ಆದರೆ ಆಡಳಿತಾರೂಢ ಬಿಜೆಪಿ ಈ ವಿಚಾರದಲ್ಲಿ ಮೌನಕ್ಕೆ ಶರಣಾಗಿದೆ. ಹೀಗಾಗಿ ಪಕ್ಷದ ನಿಲುವೇನು ? ಎಂದು ಸ್ಥಳೀಯ ಪಕ್ಷಗಳು ಪ್ರಶ್ನೆ ಮಾಡುತ್ತಿವೆ.

ಮಣಿಪುರದ ಮೇಲೆ ಹೇರಿಕೆಯಾಗಿರುವ ಅಫ್‌ಸ್ಪಾ ಅವಧಿ ಡಿಸೆಂಬರ್ 1 ಕ್ಕೆ ಕೊನೆಗೊಂಡಿದೆ. ನಾಗಲ್ಯಾಂಡ್‌ನಲ್ಲಿ ಡಿ.4 ರಂದು ಸೇನಾಪಡೆಗಳು ಗುಪ್ತದಳದ ತಪ್ಪು ಮಾಹಿತಿ ಆಧರಿಸಿ ನಾಗರಿಕ ಹತ್ಯೆ ನಡೆಸಿದ್ದವು. ಈ ಹಿನ್ನೆಲೆಯಲ್ಲಿ ಇಡಿ ಈಶಾನ್ಯ ಭಾರತದ ರಾಜ್ಯಗಳು ರಕ್ಷಣಾ ಪಡೆಗಳ ವಿಶೇಷಾಧಿಕಾರ ಕಾಯಿದೆ ವಾಪಾಸ್ ಪಡೆಯುವಂತೆ ಆಗ್ರಹಿಸುತ್ತಿವೆ. ಆದರೆ ಕಳೆದ ವಾರ ಸಭೇ ಸೇರಿದ್ದ ಕೇಂದ್ರ ಗೃಹ ಇಲಾಖೆ ನಾಗಾಲ್ಯಾಂಡ್‌ನಲ್ಲಿ ಕಾಯಿದೆ ವಿಸ್ತರಿಸಲು ನಿರ್ಧರಿಸಿದೆ.

ನಾಗಾಲ್ಯಾಂಡ್‌ನ ಎನ್‌ಪಿಎಫ್ ಪಕ್ಷ ಮಣಿಪುರದಲ್ಲೂ ಪ್ರಭಾವ ಹೊಂದಿದ್ದು, ಈ ಬಾರಿ 50 ಕ್ಷೇತ್ರದಲ್ಲಿ ಸ್ಪರ್ಧೆ ನಡೆಸುತ್ತಿದೆ. ಹೀಗಾಗಿ ಅಫ್‌ಸ್ಪಾ ವಿಚಾರ ಮಣಿಪುರದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.