Mangaluru: ಬೀದಿ ಬದಿ ವ್ಯಾಪಾರಸ್ಥರ ಸಂಘದ ಕಚೇರಿಯಿಂದ ಕಳವು

ಮಂಗಳೂರು: ನಗರದ ಮೈದಾನ ರಸ್ತೆಯಲ್ಲಿರುವ ಕಟ್ಟಡವೊಂದರ 2ನೇ ಮಹಡಿಯಲ್ಲಿರುವ ಜಿಲ್ಲಾ ಬೀದಿ ಬದಿ ವ್ಯಾಪಾರಸ್ಥರ ಸಂಘದ ಕಚೇರಿಯಿಂದ ಮೊಬೈಲ್‌ ಹಾಗೂ 20,400 ರೂ. ನಗದು ಕಳವು ಮಾಡಿರುವ ಬಗ್ಗೆ ಬಂದರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಕಟ್ಟಡಕ್ಕೆ ಹತ್ತಲು ಬಳಸಿದ ಹಗ್ಗ ಮೇಜಿನ ಮೇಲೆ ಪತ್ತೆಯಾಗಿದೆ. ಡ್ರಾವರ್‌ನ ಬೀಗ ಒಡೆಯಲಾಗಿದೆ.

ಕಚೇರಿಯ ಉಪಯೋಗಕ್ಕೆ ಬಳಸುವ 7,500 ರೂ. ಮೌಲ್ಯದ ಮೊಬೈಲ್‌ ಫೋನ್‌ ಮತ್ತು 20,400 ರೂ. ಮೊತ್ತವನ್ನು ಯಾರೋ ಕಳ್ಳರು ಕಳವು ಮಾಡಿಕೊಂಡು ಹೋಗಿದ್ದಾರೆ. ಕಚೇರಿಯ ಸಿಸಿ ಟಿವಿ ಮತ್ತು ವಿದ್ಯುತ್‌ ಸಂಪರ್ಕವನ್ನು ಕಡಿತಗೊಳಿಸಿ ಕಳ್ಳತನ ಎಸಗಿರುವುದು ಕಂಡು ಬಂದಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.