ಮಂಗಳೂರು ವಿಮಾನ ನಿಲ್ದಾಣ: ಜೂ. 1ರಿಂದ ಸಂಚಾರ ಸಹಜಸ್ಥಿತಿಗೆ

ಮಂಗಳೂರು: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ರನ್‌ವೇ ಮರು ರಚನೆಗೆ (ರಿಕಾಪೆìಟಿಂಗ್‌) ಸಂಬಂಧಿಸಿದ ಕಾಮಗಾರಿ ಮೇ 31ಕ್ಕೆ ಪೂರ್ಣವಾಗಲಿದೆ. ಜೂ. 1ರಿಂದ ದಿನದ 24 ಗಂಟೆಯೂ ರನ್‌ವೇ ಲಭ್ಯವಾಗಲಿದೆ.

ಕಾಂಕ್ರೀಟ್‌ ರನ್‌ವೇ ಡಾಮ ರೀಕರಣ/ಬ್ಲ್ಯಾಕ್‌ಟಾಪ್‌ ಕಾಮ ಗಾರಿ ಮತ್ತು ದೀಪಗಳ ಅಳವಡಿಕೆ ಕಾಮಗಾರಿ ಹಿನ್ನೆಲೆಯಲ್ಲಿ 4 ತಿಂಗಳು ಹಗಲು ವಿಮಾನಗಳ ಓಡಾಟವನ್ನು ಸ್ಥಗಿತಗೊಳಿಸಲಾಗಿತ್ತು. ರವಿವಾರ ಮತ್ತು ರಾಷ್ಟ್ರೀಯ ರಜಾದಿನಗಳನ್ನು ಹೊರತುಪಡಿಸಿ ಬೆಳಗ್ಗೆ 9.30ರಿಂದ ಸಂಜೆ 6 ರವರೆಗೆ ರನ್‌ವೇ ಬಂದ್‌ ಇದೆ. ಸಂಜೆ 6ರಿಂದ ಬೆಳಗ್ಗೆ 9.30ರ ತನಕ ಮಾತ್ರ ಮಂಗಳೂರಿನಿಂದ ವಿಮಾನಗಳ ಓಡಾಟ ನಡೆಯುತ್ತಿದೆ.

ಪ್ರಸ್ತುತ 2450 ಮೀ. ಉದ್ದ ಮತ್ತು 45 ಮೀ. ಅಗಲದ ಕಾಂಕ್ರೀಟ್‌ ರನ್‌ವೇ ಇದೆ. ಈ ಕಾಂಕ್ರೀಟ್‌ ರನ್‌ವೇ ಮೇಲೆ ಡಾಂಬರು ಹಾಕುವುದರಿಂದ ಟೇಕಾಫ್ ಮತ್ತು ಲ್ಯಾಂಡಿಂಗ್‌ ಸಂದರ್ಭ ವಿಮಾನಗಳ ಚಕ್ರಗಳಿಗೆ ನೆಲದ ಮೇಲೆ ಹೆಚ್ಚು ಹಿಡಿತ ದೊರೆಯಲಿದೆ. ಜತೆಗೆ ರನ್‌ವೇಯಲ್ಲಿ ಬೀಳುವ ನೀರು ಪೂರ್ಣ ಪ್ರಮಾಣದಲ್ಲಿ ಹೊರಗೆ ಹೋಗು ವಂತೆ ಡಾಮರೀಕರಣ/ಬ್ಲ್ಯಾಕ್ ಟಾಪ್‌ ಪೂರ್ಣಗೊಳಿಸಲಾಗುತ್ತಿದೆ. ರಿ ಕಾರ್ಪೇಂಟಿಂಗ್ ಕೆಲಸವು ರನ್‌ವೇ ಸೆಂಟರ್‌ಲೈನ್‌ ಲೈಟ್‌ಗಳ ಅಳವಡಿಕೆಯನ್ನೂ ಒಳಗೊಂಡಿದೆ. ಇದು ರಾತ್ರಿಯಲ್ಲಿ ವಿಮಾನ ಕಾರ್ಯಾಚರಣೆ ಮತ್ತು ಕಡಿಮೆ ಗೋಚರತೆ ಸಂದರ್ಭದಲ್ಲಿ ಸಹಾಯ ಮಾಡುತ್ತದೆ ಎಂದು ನಿಲ್ದಾಣದ ಮೂಲಗಳು ತಿಳಿಸಿವೆ.