1957ರಲ್ಲಿ ಕನಿಷ್ಠ; 2014ರಲ್ಲಿ ಗರಿಷ್ಠ ಮತದಾನ

ಮಂಗಳೂರು: ಮಂಗಳೂರು ಲೋಕಸಭಾ ಕ್ಷೇತ್ರದಿಂದ ಪುನರ್‌ವಿಂಗಡನೆಯ ಬಳಿಕ ದಕ್ಷಿಣ ಕನ್ನಡ ಕ್ಷೇತ್ರದವರೆಗಿನ 15 ಲೋಕಸಭಾ ಚುನಾವಣೆಗಳಲ್ಲಿ 1957ರಿಂದ 2014ರ ವರೆಗಿನ ಚುನಾವಣಾ ಇತಿಹಾಸವನ್ನು ಅವಲೋಕಿಸಿದರೆ 2014ರ ಶೇ.77.19 ಈವರೆಗಿನ ಗರಿಷ್ಠ ಮತದಾನದ ದಾಖಲೆ. 1957ರಲ್ಲಿ ಆಗಿರುವ ಶೇ. 57.42 ಕನಿಷ್ಠ ಮತದಾನ. ಈ 15 ಚುನಾವಣೆಗಳಲ್ಲಿ 9 ಬಾರಿ ಶೇ.70ಕ್ಕಿಂತ ಅಧಿಕ ಮತದಾನವಾಗಿದೆ. 2014ರ ಲೋಕಸಭಾ ಚುನಾವಣೆಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಆಗಿರುವ ಶೇ.77.19 ಗರಿಷ್ಠ ಮತದಾನವಾಗಿದ್ದು, ರಾಜ್ಯದಲ್ಲೇ ಅತ್ಯಂತ ಹೆಚ್ಚು ಮತದಾನವಾಗಿರುವ ಕ್ಷೇತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿತ್ತು.