ಮುಂಬಯಿ: ಕೋಟ್ಯಾಂತರ ಮೌಲ್ಯದ ಹೆರಾಯಿನ್‌ ಸಹಿತ ವ್ಯಕ್ತಿಯ ಬಂಧನ

ಮುಂಬಯಿ: ಇಲ್ಲಿನ ಸಾಂತಾಕ್ರೂಜ್‌ ಪರಿಸರದಲ್ಲಿ 1.3 ಕೋಟಿ ರೂ. ಮೌಲ್ಯದ ಹೆರಾಯಿನ್‌ ಸಹಿತ 27 ವರ್ಷದ ವ್ಯಕ್ತಿಯೊಬ್ಬನನ್ನು ಮುಂಬಯಿ ಪೊಲೀಸರ ಆ್ಯಂಟಿ ನಾರ್ಕೋಟಿಕ್‌ ಸೆಲ್‌ (ಎಎನ್‌ಸಿ) ಬಂಧಿಸಿದೆ ಎಂದು ಅಧಿಕಾರಿಯೊಬ್ಬರು ಶನಿವಾರ ತಿಳಿಸಿದ್ದಾರೆ.

ಶುಕ್ರವಾರ ಸಂಜೆ ವಕೋಲಾ ಸೇತುವೆಯ ಬಳಿ ವ್ಯಕ್ತಿಯು ಅನುಮಾನಾಸ್ಪದವಾಗಿ ತಿರುಗಾಡುತ್ತಿದ್ದಾಗ ಎಎನ್‌ಸಿಯ ಕಾಂದಿವಲಿ ಘಟಕದ ಅಧಿಕಾರಿಗಳು ವಿಚಾರಣೆ ನಡೆಸಿದರು.

ಈ ವೇಳೆ ಆತನ ಬ್ಯಾಗ್‌ ತಪಾಸಣೆ ನಡೆಸಿದಾಗ 1.3 ಕೋಟಿ ಮೌಲ್ಯದ 325 ಗ್ರಾಂ ಹೆರಾಯಿನ್‌ ಪತ್ತೆಯಾಗಿದೆ. ಆರೋಪಿಯು ತನ್ನ ಗ್ರಾಹಕರಿಗೆ ಅಕ್ರಮ ವಸ್ತುಗಳನ್ನು ತಲುಪಿಸಲು ಸಾಂತಾಕ್ರೂಜ್‌ಗೆ ಬಂದಿದ್ದ ಎಂದು ಅವರು ಹೇಳಿದರು.

ಈ ಸಂಬಂಧ ನಾರ್ಕೋಟಿಕ್‌ ಡ್ರಗ್ಸ್ ಮತ್ತು ಸೈಕೋಟ್ರೋಪಿಕ್‌ ಸಬ್‌ಸ್ಟೆನ್ಸ್ (ಎನ್‌ಡಿಪಿಎಸ್‌) ಕಾಯ್ದೆಯ ಸಂಬಂಧಿತ ಸೆಕ್ಷನ್‌ಗಳ ಅಡಿಯಲ್ಲಿ ಪ್ರಕರಣವನ್ನು ದಾಖಲಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.