ಮಹಾರಾಷ್ಟ್ರ ಸಚಿವರ ಹೆಸರಲ್ಲಿ ನಕಲಿ ಫೇಸ್‌ ಬುಕ್‌ ಖಾತೆ: ಆರೋಪಿ ಸೆರೆ

ಪುಣೆ : ಸಾಮಾಜಿಕ ಜಾಲ ತಾಣಗಳಲ್ಲಿ  ಮಹಾರಾಷ್ಟ್ರ ಸಚಿವರೋರ್ವರ ನಕಲಿ ಖಾತೆಯನ್ನು ತೆರೆದು ಆಕ್ಷೇಪಾರ್ಹ ಫೋಟೋ ಹಾಗೂ ವಿಷಯಗಳನ್ನು ಹಾಕಿದ ಆರೋಪದ ಮೇಲೆ 30ರ ಹರೆಯದ ಆರೋಪಿಯನ್ನು  ಪುಣೆ ಪೊಲೀಸ್‌ನ ಸೈಬರ್‌ ಸೆಲ್‌ ಅಧಿಕಾರಿಗಳು ಬಂಧಿಸಿದ್ದಾರೆ. 

ಬಂಧಿತ ಆರೋಪಿಯ ಹೆಸರು ಋತುರಾಜ ನಲವಡೆ. ಈತ ಪುಣೆ ಜಿಲ್ಲೆಯ ಜುನ್ನಾರ್‌ ತೆಹಶೀಲ್‌ ನಿವಾಸಿ. ಈತ ಮಹಾರಾಷ್ಟ್ರದ ಆಹಾರ ಮತ್ತು ನಾಗರಿಕ ಪೂರೈಕೆ ಸಚಿವ ಗಿರೀಶ್‌ ಬಾಪಟ್‌ ಅವರ ಹೆಸರಿನಲ್ಲಿ ಸಾಮಾಜಿಕ ಜಾಲ ತಾಣಗಳಲ್ಲಿ ನಕಲಿ ಖಾತೆ ತೆರೆದು, ಆಕ್ಷೇಪಾರ್ಹ ಫೋಟೋಗಳನ್ನು ಹಾಗೂ ವಿಷಯಗಳನ್ನು ಹಾಕಿದ್ದಾನೆ. ಸಚಿವರಿಗೆ ಪರಿಚಿತರಿರುವ ಅನೇಕರಿಗೆ ಆತ ಫ್ರೆಂಡ್‌ ರಿಕ್ವೆಸ್ಟ್‌  ಕಳುಹಿಸಿದ್ದು ಅದನ್ನು  ಅವರು ಸ್ವೀಕರಿಸಿದ್ದಾರೆ. 

ಸಚಿವ ಬಾಪಟ್‌ ಅವರ ಪ್ರಚಾರ ಸಲಹೆಗಾರನಾಗಿದ್ದು ಬಿಜೆಪಿ ನಾಯಕನ ಸಾಮಾಜಿಕ ಜಾಲ ಖಾತೆಗಳನ್ನು ನಿಭಾಯಿಸುತ್ತಿರುವ ಸುನೀಲ್‌ ಮಾನೆ ಅವರು ಈ ಬಗ್ಗೆ  ಪೊಲೀಸರಿಗೆ ದೂರು ನೀಡಿದ್ದರು. ಅಂತೆಯೇ ಪೊಲೀಸರು ಆರೋಪಿ ನಲವಡೆಯನ್ನು ಬಂಧಿಸಿದರು.