Malpe: ನಾಪತ್ತೆಯಾಗಿದ್ದ ಮೀನುಗಾರನ ಮೃತದೇಹ ಪತ್ತೆ

ಮಲ್ಪೆ: ಮೀನುಗಾರಿಕೆ ನಡೆಸುವ ವೇಳೆ ಬೋಟಿನಿಂದ ಆಯತಪ್ಪಿ ಸಮುದ್ರಕ್ಕೆ ಬಿದ್ದು ಕಣ್ಮರೆಯಾಗಿದ್ದ ಮೀನುಗಾರ ಕೃಷ್ಣ ತಿಮ್ಮಪ್ಪ ಗೌಡ (45) ಅವರ ಮೃತದೇಹವು ಡಿ. 27ರಂದು ಸಂಜೆ ಪತ್ತೆಯಾಗಿದೆ.

ಶ್ರೀ ದತ್ತಾಂಜನೇಯ ಬೋಟಿನಲ್ಲಿ ಮೀನುಗಾರಿಕೆ ಕೆಲಸ ಮಾಡಿಕೊಂಡಿದ್ದ ಅವರು ಡಿ. 24ರಂದು ಮಧ್ಯಾಹ್ನ 31 ಮಂದಿ ಮೀನುಗಾರರ ಜತೆ ಮೀನುಗಾರಿಕೆಗೆ ತೆರಳಿದ್ದರು. ಡಿ. 25ರಂದು ಬೆಳಗ್ಗಿನ ಜಾವ 2 ಗಂಟೆ ವೇಳೆ ಸಮುದ್ರ ಮಧ್ಯೆ ಬಲೆಯನ್ನು ಎಳೆಯುವ ವೇಳೆ ಕೃಷ್ಣ ಅವರು ಆಯತಪ್ಪಿ ಸಮುದ್ರಕ್ಕೆ ಬಿದ್ದು ಕಣ್ಮರೆಯಾಗಿದ್ದರು. ತತ್‌ಕ್ಷಣ ಜತೆಯಲಿದ್ದವರು ಹುಡುಕಾಡಿದರೂ ಪತ್ತೆಯಾಗಲಿಲ್ಲ.

ಶುಕ್ರವಾರ ಮಲ್ಪೆಗೆ 9 ಮಾರು ದೂರದಲ್ಲಿ ಕೃಷ್ಣ ಅವರ ಮೃತದೇಹ ಪತ್ತೆಯಾಗಿದೆ. ಮಲ್ಪೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.