ಲಾಸ್‌ ಕ್ಯಾಬಸ್‌ ಓಪನ್‌ ಟೆನಿಸ್‌: ಫ್ಯಾಬಿಯೊ ಫಾನಿನಿ ಚಾಂಪಿಯನ್‌

ಲಾಸ್‌ ಕ್ಯಾಬಸ್‌ (ಮೆಕ್ಸಿಕೊ): ಆರ್ಜೆಂಟೀನಾದ ನೆಚ್ಚಿನ ಆಟಗಾರ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ಅವರನ್ನು ಮಣಿಸಿದ ಇಟಲಿಯ ಪ್ಯಾಬಿಯೊ ಫಾನಿನಿ “ಎಟಿಪಿ ಲಾಸ್‌ ಕ್ಯಾಬಸ್‌ ಓಪನ್‌’ ಟೆನಿಸ್‌ ಪ್ರಶಸ್ತಿಯನ್ನೆತ್ತಿದ್ದಾರೆ.

ರವಿವಾರದ ಫೈನಲ್‌ನಲ್ಲಿ ಫ್ಯಾಬಿಯೊ ಫಾನಿನಿ 6-4, 6-2 ಅಂತರದ ನೇರ ಸೆಟ್‌ ಜಯ ಸಾಧಿಸಿದರು. ಇದು ಇಟಲಿ ಟೆನಿಸಿಗನ ಪಾಲಾದ 8ನೇ ಎಟಿಪಿ ಪ್ರಶಸ್ತಿಯಾದರೆ, ಹಾರ್ಡ್‌ಕೋರ್ಟ್‌ನಲ್ಲಿ ಒಲಿದ ಮೊದಲ ಪ್ರಶಸ್ತಿ.

ಇದರೊಂದಿಗೆ ಫಾನಿನಿ 2018ರ ಋತುವಿನಲ್ಲಿ 3ನೇ ಟೆನಿಸ್‌ ಪ್ರಶಸ್ತಿ ಎತ್ತಿದಂತಾಯಿತು. ಇದಕ್ಕೂ ಮುನ್ನ ಸಾವೋ ಪೌಲೊ, ಬಸ್ಟಾಡ್‌ ಟೂರ್ನಿಯಲ್ಲೂ ಗೆದ್ದು ಬಂದಿದ್ದರು.ರವಿವಾರದ ಸಾಧನೆಯಿಂದಾಗಿ ಫ್ಯಾಬಿಯೊ ಫಾನಿನಿ ನೂತನ ಟೆನಿಸ್‌ ರ್‍ಯಾಂಕಿಂಗ್‌ನಲ್ಲಿ ಒಂದು ಸ್ಥಾನ ಮೇಲೇರಲಿದ್ದಾರೆ (14).ಇದು ಡೆಲ್‌ ಪೊಟ್ರೊ-ಫಾನಿನಿ ನಡುವಿನ ಕೇವಲ 2ನೇ ಮುಖಾಮುಖೀಯಾಗಿದೆ. ಇದಕ್ಕೂ ಮುನ್ನ 2015ರ ಸಿಡ್ನಿ ಪಂದ್ಯಾವಳಿಯಲ್ಲಿ ಫಾನಿನಿ ವಿರುದ್ಧ ಅವರು ಜಯ ಸಾಧಿಸಿದ್ದರು.