Lokasabha Session: ವಿದೇಶಿ ಶಕ್ತಿ ಜತೆ ರಾಹುಲ್‌ ನಂಟು ಬಿಜೆಪಿ ಆರೋಪ: ಕಾಂಗ್ರೆಸ್‌ ವ್ಯಗ್ರ

ಹೊಸದಿಲ್ಲಿ: ವಿಪಕ್ಷ ನಾಯಕ ರಾಹುಲ್‌ ಗಾಂಧಿಗೆ ಅಮೆರಿಕ ಮೂಲದ ಶತಕೋಟ್ಯಧೀಶರೊಬ್ಬರ ಜತೆ ಬಿಜೆಪಿ ನಂಟು ಕಲ್ಪಿಸಿದ ಹಿನ್ನೆಲೆಯಲ್ಲಿ ಗುರುವಾರ ಲೋಕಸಭೆ 2 ಬಾರಿ ಮುಂದೂಡಿಕೆಯಾಯಿತು.

ಶೂನ್ಯ ವೇಳೆಯಲ್ಲಿ ವಿಷಯ ಪ್ರಸ್ತಾವಿಸಿದ ಬಿಜೆಪಿಯ ನಿಶಿಕಾಂತ್‌ ದುಬೆ, ಶತಕೋಟ್ಯಧೀಶ ಜಾರ್ಜ್‌ ಸೋರೋಸ್‌ ನಂಟು ಹೊಂದಿರುವ ಒಸಿಸಿಆರ್‌ಪಿ (ಸಂಘ­ಟಿತ ಅಪರಾಧ ಮತ್ತು ಭ್ರಷ್ಟಾಚಾರ ರಿಪೋರ್ಟಿಂಗ್‌ ಪ್ರಾಜೆಕ್ಟ್) ಪ್ರಕಟಿಸಿದ ವರದಿ ಆಧಾರದ ಮೇಲೆ ಕಾಂಗ್ರೆಸ್‌ ನೇತೃತ್ವದ ವಿಪಕ್ಷಗಳು ಕಲಾಪವನ್ನು ಹಾಳು ಮಾಡುತ್ತಿವೆ ಎಂದು ಆರೋಪಿಸಿದರು. ದುಬೆ ಅವರ ಈ ಮಾತಿಗೆ ಕಾಂಗ್ರೆಸ್‌ ಸದಸ್ಯರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದರಿಂದ ಕಲಾಪವನ್ನು ಶುಕ್ರವಾರಕ್ಕೆ ಮುಂದೂಡಲಾಯಿತು.

ರಾಹುಲ್‌ ದೇಶದ್ರೋಹಿ- ಬಿಜೆಪಿ:
ಭಾರತವನ್ನು ಅಸ್ಥಿರಗೊಳಿಸಲು ಪ್ರಯತ್ನಿಸುತ್ತಿರುವ ತನಿಖಾ ಮಾಧ್ಯಮ ಸಂಸ್ಥೆಗಳು ಸೇರಿದಂತೆ ವಿದೇಶಿ ಶಕ್ತಿಗಳ ಜತೆ ರಾಹುಲ್‌ ಗಾಂಧಿ ನಂಟು ಹೊಂದಿದ್ದಾರೆ. ಅವರೊಬ್ಬ ದೇಶದ್ರೋಹಿ ಎಂದು ಬಿಜೆಪಿ ನಾಯಕ ಸಂಭಿತ್‌ ಪಾತ್ರಾ ಆರೋಪಿಸಿದ್ದಾರೆ. ಜಾರ್ಜ್‌ ಸೋರೋಸ್‌-ಒಸಿಸಿಆರ್‌ಪಿ- ರಾಹುಲ್‌ ಗಾಂಧಿ- ಇದೊಂದು ಅಪಾಯಕಾರಿ ತ್ರಿಕೋನ ನಂಟು ಎಂದರು.