ಹಳ್ಳದಲ್ಲಿ ಲಾರಿ ಪಲ್ಟಿ: ಮೂವರ ರಕ್ಷಣೆ

ಸಿರುಗುಪ್ಪ: ತಾಲೂಕಿನ ರಾರಾವಿ ಗ್ರಾಮದ ಯಲ್ಲಮ್ಮನ ಹಳ್ಳದ ನೀರಿನಲ್ಲಿ ಲಾರಿ ಪಲ್ಟಿಯಾಗಿ ಮೂವರು ಪ್ರಾಣಾಪಾಯದಿಂದ ಪಾರಾದ ಘಟನೆ ಸೋಮವಾರ ನಡೆದಿದೆ.

ಭಾನುವಾರ ರಾತ್ರಿ ನೆರೆಯ ಸೀಮಾಂಧ್ರಪ್ರದೇಶದ ಹೊಳಗುಂದಿ, ಎಳ್ಳಾರ್ತಿ ಮುಂತಾದ ಭಾಗಗಳಲ್ಲಿ ಉತ್ತಮ ಮಳೆಯಾಗಿದ್ದರಿಂದ ಮತ್ತು ತಾಲೂಕಿನ ಬಗ್ಗೂರು, ಕೆ.ಬೆಳಗಲ್ಲು ಗ್ರಾಮಗಳಲ್ಲಿ ಸಾಧಾರಣ ಮಳೆ ಸುರಿದಿದ್ದರಿಂದ ಸಿರಗುಪ್ಪ-ಆದೋನಿ ರಸ್ತೆಯಲ್ಲಿರುವ ಯಲ್ಲಮ್ಮನ ಹಳ್ಳಕ್ಕೆ ಏಕಾಏಕಿ ಅತಿ ಹೆಚ್ಚು ನೀರು ಬಂದಿದೆ.

ನೀರಿನ ರಭಸಕ್ಕೆ ಸೀಮಾಂಧ್ರದಿಂದ ಸಿರಗುಪ್ಪಕ್ಕೆ ಬರುತ್ತಿದ್ದ ಲಾರಿ ಚಾಲಕನ ನಿಯಂತ್ರಣ ತಪ್ಪಿ ಪಲ್ಟಿಯಾಗಿದೆ. ಲಾರಿಯಲ್ಲಿದ್ದ ಶೇಕ್‌ಇದಾಯತ್‌, ಜುರೇನ್‌ ಅಹ್ಮದ್‌, ಮುಶೀರ್‌ಅಹ್ಮದ್‌ರನ್ನು ಸಿರಗುಪ್ಪ ಸಿಪಿಐ ಮೌನೇಶ್‌ಮಾಲೀಪಾಟಿಲ್ ನೇತೃತ್ವದಲ್ಲಿ ನಗರದ ಅಗ್ನಿಶಾಮಕ ಸಿಬ್ಬಂದಿ ಮತ್ತು ಸ್ಥಳೀಯರ ಸಹಕಾರದಿಂದ ತೆಪ್ಪದ ಮೂಲಕ ರಕ್ಷಿಸಲಾಗಿದೆ.

ಭಾನುವಾರ ರಾತ್ರಿ ವಿವಿಧೆಡೆ ಸಾಧಾರಣ ಮಳೆ ಸುರಿದಿದ್ದು, ಸಿರಗುಪ್ಪ-3.5 ಮೀ. ಮೀ., ತೆಕ್ಕಲಕೋಟೆ-4.4, ಸಿರಿಗೇರಿ-2.3, ಎಂ. ಸೂಗೂರು-13.8, ಹಚ್ಚೊಳ್ಳಿ-18.5, ಕರೂರು-6.6, ಕೆ.ಬೆಳಗಲ್ಲು-8.2, ರಾವಿಹಾಳ್‌-25.02 ಮೀ.ಮೀ. ಮಳೆಯಾಗಿದೆ ಎಂದು ಸಾಂಖೀಕ ಇಲಾಖೆ ಅಧಿಕಾರಿ ಬಾಬು ತಿಳಿಸಿದ್ದಾರೆ.