ಮಂಗನ ಕಾಯಿಲೆ ಮುಂಜಾಗ್ರತಾ ಕ್ರಮ ಅಗತ್ಯ: ಡಾ|ಪ್ರತಾಪ್‌ ಕುಮಾರ್‌

ತೆಕ್ಕಟ್ಟೆ: ಕುಂದಾಪುರ ಕಾರ್ಯನಿರ್ವಹಣಾಧಿಕಾರಿ ಮತ್ತು ಜಿಲ್ಲಾ ಕಾರ್ಯನಿರ್ವಾಹಣಾಧಿಕಾರಿ ಅವರ ಮಾರ್ಗದರ್ಶನದಂತೆ ಆರೋಗ್ಯ ಇಲಾಖೆ ಮತ್ತು ಗ್ರಾ.ಪಂ. ಕೊರ್ಗಿ ಅವರ ವತಿಯಿಂದ ಮಂಗನ ಕಾಯಿಲೆ ಹರಡದಂತೆ ಮಂಜಾಗ್ರತೆ ಮಾಹಿತಿ ಶಿಬಿರವು ಗ್ರಾ.ಪಂ. ಸಭಾಭವನದಲ್ಲಿ  ಜ. 17ರಂದು ನಡೆಯಿತು.

ಈ ಸಂದರ್ಭ ಕೊರ್ಗಿ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ| ಕೆ. ಪ್ರತಾಪ್‌ ಕುಮಾರ್‌ ಮಾತನಾಡಿ, ಕೊರ್ಗಿ ಪರಿಸರದಲ್ಲಿ ಇದುವರೆಗೆ ಮಂಗನ ಕಾಯಿಲೆ ಪ್ರಕರಣಗಳು ಕಂಡು ಬಂದಿಲ್ಲ. ಆದರೂ ಕೊರ್ಗಿ ಸುತ್ತಮುತ್ತಲ ಗ್ರಾಮಗಳು ಅರಣ್ಯ ಪ್ರದೇಶಕ್ಕೆ ಹೊಂದಿ ಕೊಂಡಿರುವುದರಿಂದ ಮುಂಜಾಗ್ರತೆ ಮುಖ್ಯ ಎಂದು ಹೇಳಿದರು.

ಈ ಸಂದರ್ಭ ಕೊರ್ಗಿ ಗ್ರಾ.ಪಂ. ಅಧ್ಯಕ್ಷೆ ಗಂಗೆ ಕುಲಾಲ್ತಿ, ಉಪಾಧ್ಯಕ್ಷ ಗೌರೀಶ ಹೆಗ್ಡೆ , ತೋಟಗಾರಿಕಾ ಇಲಾಖೆಯ ಸಹಾಯಕ ಅಧಿಕಾರಿ ಮಧುಕರ್‌, ಗ್ರಾ.ಪಂ. ಸದಸ್ಯರು,  ಪ್ರವೀಣ, ಮೋಹನ ಚಂದ್ರ, ಶಿಲ್ಪಾ  ಉಪಸ್ಥಿತರಿದ್ದರು.

ಪಿಡಿಒ ಸುಧಾಕರ ಶೆಟ್ಟಿ ಗುಡ್ಡಮ್ಮಾಡಿ ಪ್ರಾಸ್ತಾವಿಕವಾಗಿ ಮಾತನಾಡಿ, ಗ್ರಾ.ಪಂ. ಸಿಬಂದಿ ವರ್ಗ ಸಹಕರಿಸಿದರು. ಕಾರ್ಯದರ್ಶಿ ದಿನೇಶ ಶೆಟ್ಟಿ ನಿರೂಪಿಸಿ, ವಂದಿಸಿದರು.