Kumbale: ಕಾರಿನಲ್ಲಿ ಮಾರಕಾಯುಧಗಳ ಸಹಿತ ಸಂಚರಿಸುತ್ತಿದ್ದ ಯುವಕನ ಬಂಧನ

ಕುಂಬಳೆ: ಕಾರಿನಲ್ಲಿ ಮಾರಕಾಯುಧಗಳನ್ನು ಬಚ್ಚಿಟ್ಟು ಸಂಚರಿಸುತ್ತಿದ್ದ ದಕ್ಷಿಣ ಕನ್ನಡ ಜಿಲ್ಲೆಯ ಆಮ್ಟಾಡಿ ಲೋರೆಟ್ಟೋ ಗುತ್ತಾರ್‌ನ ಅಡ್ಲಿ ಜೋಕಿಂ ಕ್ಯಾಸ್ತೆಲಿನೋ(23)ನನ್ನು ಕುಂಬಳೆ ಪೊಲೀಸರು ಬಂಧಿಸಿದ್ದಾರೆ.

ಡಿ.10ರ ಮಂಗಳವಾರ ಮುಂಜಾನೆ 5 ಗಂಟೆಗೆ ಬಂದ್ಯೋಡ್‌-ಪೆರ್ಮುದೆ ರಸ್ತೆಯ ಗೋಳಿನಡ್ಕದಲ್ಲಿ ಹೊಟೇಲ್‌ ಸಮೀಪ ಬಿಳಿ ಬಣ್ಣದ ರಿಟ್ಸ್‌ ಕಾರು ನಿಲ್ಲಿಸಲಾಗಿತ್ತು. ಈ ಕಾರಿನ ಕುರಿತು ಸಂಶಯಗೊಂಡು ಹತ್ತಿರಕ್ಕೆ ಹೋದಾಗ ಚಾಲಕ ಕಾರನ್ನು ಚಲಾಯಿಸಿತೊಡಗಿದನು. ಆ ವೇಳೆ ಅದನ್ನು ತಡೆದು ನಿಲ್ಲಿಸಿ ಪರಿಶೀಲಿಸಿದಾಗ ಕಾರಿನೊಳಗೆ ಮುಖವಾಡ, ಗ್ಲೌಸ್‌, ಚಾಕುಗಳು, ಬಾಳು ಸಹಿತ ಮಾರಕಾಯುಧಗಳು ಪತ್ತೆಯಾಯಿತು. ಒಂದು ಚಾಕನ್ನು ಚಾಲಕನ ಸೀಟಿನ ಕೆಳಗೆ ಮ್ಯಾಟ್‌ನಡಿಯಲ್ಲಿ ಬಚ್ಚಿಡಲಾಗಿತ್ತು. ಉಳಿದ ಮಾರಕಾಯುಧಗಳನ್ನು ಢಿಕ್ಕಿಯಲ್ಲಿ ಇರಿಸಲಾಗಿತ್ತು.

ಈತ ಯಾವ ಉದ್ದೇಶದಿಂದ ಮಾರಕಾಯುಧಗಳೊಂದಿಗೆ ಬಂದಿದ್ದಾನೆ ಎಂದು ತಿಳಿದು ಬಂದಿಲ್ಲ.ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆಯೆಂದು ಎಂದು ಪೊಲೀಸರು ತಿಳಿಸಿದ್ದಾರೆ.