ನ್ಯೂಯಾರ್ಕ್‌: ಪುಲ್ವಾಮಾ ದಾಳಿಯಿಂದಾಗಿ ಭಾರತ ಹಾಗೂ ಪಾಕಿಸ್ಥಾನದ ಮಧ್ಯೆ ಬಿಕ್ಕಟ್ಟು ಸೃಷ್ಟಿಯಾಗಿರುವಾಗಲೇ, ಪಾಕಿಸ್ಥಾನದಲ್ಲಿ ಬಂಧಿತ ಭಾರತೀಯ ಕುಲಭೂಷಣ್‌ ಜಾಧವ್‌ ಗಲ್ಲು ಶಿಕ್ಷೆ ತಡೆಗೆ ಭಾರತವು ವಿಶ್ವಸಂಸ್ಥೆ ನ್ಯಾಯಾಲಯದ ಮೆಟ್ಟಿಲೇರಿದೆ. ಸೋಮವಾರ ಈ ಪ್ರಕರಣದ ವಿಚಾರಣೆ ನಡೆಯಲಿದೆ. ಈ ಹಿಂದೆ ಅಂತಾರಾಷ್ಟ್ರೀಯ ನ್ಯಾಯಾಲಯವು ಭಾರತದ ವಾದಕ್ಕೆ ಮನ್ನಣೆ ನೀಡಿದ್ದರಿಂದ, ಜಾಧವ್‌ ಗಲ್ಲು ಶಿಕ್ಷೆ ಜಾರಿಗೆ ತಡೆ ನೀಡಲಾಗಿತ್ತು. ಈಗ ಈ ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ ಭಾರತ ವಾದ ಮಂಡಿಸಲಿದೆ. ಈ ಪ್ರಕ್ರಿಯೆ ಫೆ. 21 ರವರೆಗೆ ನಡೆಯಲಿದೆ. ಭಾರತದ ವಾದಕ್ಕೆ ಮನ್ನಣೆ ಲಭ್ಯವಾದರೆ ಜಾಧವ್‌ ಬಿಡುಗಡೆಗೆ ಆದೇಶ ನೀಡುವ ಸಾಧ್ಯತೆಯಿದೆ. ಭಾರತದ ಗೂಢಚಾರ್ಯೆ ಆರೋಪದಡಿ, ಪಾಕಿಸ್ಥಾನದ 2017ರ ಏಪ್ರಿಲ್‌ನಲ್ಲಿ ಇರಾನ್‌ನಿಂದ ಇವರನ್ನು ಬಂಧಿಸಿತ್ತು. ಪುಲ್ವಾಮಾ ದಾಳಿ ನಡೆದ ಹಿನ್ನೆಲೆಯಲ್ಲೇ ಈ ವಿಚಾರಣೆ ನಡೆಯಲಿರುವುದರಿಂದ ಕೋರ್ಟ್‌ನಲ್ಲಿ ಭಾರತದ ವಾದಕ್ಕೆ ಇನ್ನಷ್ಟು ಪುಷ್ಟಿ ದೊರೆಯುವ ಸಾಧ್ಯತೆ ಇದೆ ಎನ್ನಲಾಗಿದೆ.
