ಗೆದ್ದ ಖುಷಿಯಲ್ಲಿ ಟ್ರೈನ್‌ ಹತ್ತಲಿರುವ ಕೃಷ್ಣ

“ಡಾರ್ಲಿಂಗ್‌’ ಕೃಷ್ಣ “ಲವ್‌ ಮಾಕ್ಟೇಲ್‌’ ಚಿತ್ರದ ಮೂಲಕ ಗೆಲುವು ಕಂಡಿದ್ದು ನಿಮಗೆ ಗೊತ್ತೇ ಇದೆ. ಒಂದರ್ಥದಲ್ಲಿ ಸೋತು ಗೆದ್ದವರು ಎನ್ನಬಹುದು. ಚಿತ್ರ ಚೆನ್ನಾಗಿದೆ ಎಂಬ ಮೆಚ್ಚುಗೆ ಕೇಳಿಬಂದರೂ ಆರಂಭದಲ್ಲಿ “ಲವ್‌ ಮಾಕ್ಟೇಲ್‌’ಗೆ ಪ್ರೇಕ್ಷಕರ ಕೊರತೆ ಕಾಡಿದ್ದು ಸುಳ್ಳಲ್ಲ. ಆದರೆ, ಆ ನಂತರ ಚಿತ್ರ ಬಾಯಿ ಮಾತಿನಿಂದಲೇ ಪ್ರಚಾರ ಪಡೆದು ಈಗ ಹಿಟ್‌ಲಿಸ್ಟ್‌ ಸೇರಿದೆ. ಈ ಖುಷಿಯಲ್ಲಿ ಕೃಷ್ಣ ಕೂಡಾ ಇದ್ದಾರೆ. ಈಗ ಅವರ ಮತ್ತೂಂದು ಚಿತ್ರ ಬಿಡುಗಡೆಯ ಹಂತಕ್ಕೆ ಬಂದಿದೆ. ಅದು “ಲೋಕಲ್‌ ಟ್ರೈನ್‌’.

ಇದು ಬಿಡುಗಡೆಗೆ ಸಿದ್ಧವಾಗಿರುವ ಕೃಷ್ಣ ಚಿತ್ರ. ಈ ಚಿತ್ರ ಈ ತಿಂಗಳಾಂತ್ಯಕ್ಕೆ ತೆರೆಕಾಣುತ್ತಿದೆ. ಸಂಜನಾ ಸಿನಿ ಆರ್ಟ್ಸ್ ಲಾಂಛನದಲ್ಲಿ ಎಸ್‌.ಹೆಚ್‌.ವಾಳ್ಕೆ ಅವರು ನಿರ್ಮಿಸಿರುವ “ಲೋಕಲ್‌ ಟ್ರೈನ್‌’ ಚಿತ್ರವನ್ನು ವೀಕ್ಷಿಸಿದ ಪ್ರಾದೇಶಿಕ ಸೆನ್ಸಾರ್‌ ಮಂಡಳಿ ಯು/ಎ ಅರ್ಹತಾ ಪತ್ರವನ್ನು ನೀಡಿದೆ. ಈ ಚಿತ್ರದಲ್ಲಿ ಮೀನಾಕ್ಷಿ ದೀಕ್ಷಿತ್‌, ಎಸ್ತರ್‌ ನರೋನ, ಸುಚೇಂದ್ರ ಪ್ರಸಾದ್‌, ಸಾಧುಕೋಕಿಲ, ಚಿ.ಗುರುದತ್‌, ಮೈಸೂರು ಗೋಪಿ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ.

ಐದು ಹಾಡುಗಳಿರುವ ಈ ಚಿತ್ರಕ್ಕೆ ಅರ್ಜುನ್‌ ಜನ್ಯ ಈ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ನಿರ್ಮಾಪಕ ಎಸ್‌.ಹೆಚ್‌.ವಾಳ್ಕೆ ಅವರು ಕಥೆ ಬರೆದಿದ್ದು, ರುದ್ರಮುನಿ ನಿರ್ದೇಶನ ಮಾಡಿದ್ದಾರೆ. ರಮೇಶ್‌ ಬಾಬು ಛಾಯಾಗ್ರಹಣ, ಪಿ.ಆರ್‌.ಸೌಂದರ್‌ ರಾಜ್‌ ಸಂಕಲನ, ರಾಜು ಸುಂದರಂ, ಚಿನ್ನಿಪ್ರಕಾಶ್‌ ನೃತ್ಯ ಹಾಗೂ ಪಳನಿರಾಜ್‌, ಚೆನ್ನೈ ರಮೇಶ್‌ ಅವರ ಸಾಹಸವಿದೆ.ಈ ಚಿತ್ರಕ್ಕೆ ಕೇಶವಾದಿತ್ಯ, ಮಾರುತಿ.ಟಿ ಸಂಭಾಷಣೆ ಬರೆದಿದ್ದಾರೆ.