ಶ್ರಮದಾನದ ಮೂಲಕ ಬಾವಿ ಸಿದ್ಧ

ಉಳ್ಳಾಲ: ಕೊಣಾಜೆ ಗ್ರಾಮದ ಗುರುಮೇರು ಪ್ರದೇಶದ ಯುವಕರ ತಂಡವೊಂದು ಬಾವಿ ಕೊರೆದು ಮಾದರಿಯಾಗಿದೆ. ಹಲವು ವರ್ಷಗಳಿಂದ ಈ ಪ್ರದೇಶದಲ್ಲಿ ಬೇಸಗೆ ಕಾಲದಲ್ಲಿ ನೀರಿನ ಸಮಸ್ಯೆ ಕಾಡುತ್ತಿದ್ದು, ನೂತನ ಬಾವಿಯಿಂದಾಗಿ ಹಲವು ಮನೆಗಳಿಗೆ ನೀರು ದೊರೆಯಲಿದೆ.

ಇದೇ ಯುವಕರ ತಂಡ ಇತ್ತೀಚೆಗೆ ಸ್ವಂತ ದುಡ್ಡಿನಲ್ಲಿ ಗುರುಮೇರು-ಕೊಣಾಜೆ ಅಣ್ಣೆರೆಪಾಲು ಸಂಪರ್ಕ ರಸ್ತೆಯನ್ನು ನಿರ್ಮಿ ಸಿತ್ತು. ಕೊಣಾಜೆ ಗುರುಮೇರು ನಿವಾಸಿಗಳಾದ ದೀಕ್ಷಿತ್‌ ಶೆಟ್ಟಿಗಾರ್‌, ಕಮಲಾಕ್ಷ ಶೆಟ್ಟಿಗಾರ್‌, ಪ್ರಶಾಂತ್‌, ಪ್ರಸಾದ್‌, ಯಶವಂತ್‌, ರಾಜೇಶ್‌, ಚಂದ್ರಶೇಖರ್‌ ಈ ತಂಡದಲ್ಲಿದ್ದಾರೆ. ಏಳು ದಿನ ಸಂಜೆ 4ರಿಂದ ರಾತ್ರಿ 12ರ ವರೆಗೆ ಶ್ರಮದಾನ ನಡೆಸಿದ್ದು, ಒಂಬತ್ತು ಅಡಿ ಸುತ್ತಳತೆಯ 20 ಅಡಿ ಆಳದ ಬಾವಿ ಸಿದ್ಧವಾಗಿದೆ. ಸುಮಾರು ಒಂದೂವರೆ ಅಡಿ ನೀರು ದೊರೆಯುತ್ತಿದೆ.