ಕೋಡಿಂಬಾಡಿ: ಬೈಹುಲ್ಲು ಸಾಗಾಟದ ಪಿಕಪ್‌ಗೆ ಬೆಂಕಿ

ಪುತ್ತೂರು: ಹೊರ ಜಿಲ್ಲೆಯಿಂದ ಬೈ ಹುಲ್ಲು ತರುತ್ತಿದ್ದ ಪಿಕಪ್‌ ವಾಹನಕ್ಕೆ ಕೋಡಿಂಬಾಡಿ ಗ್ರಾಮದ ಕಿನ್ನೆತ್ತಿ ಪಳಿಕೆಯಲ್ಲಿ ವಿದ್ಯುತ್‌ ಶಾರ್ಟ್‌ ಸರ್ಕ್ನೂಟ್‌ ಉಂಟಾಗಿ ಬೆಂಕಿ ಸ್ಪರ್ಶವಾದ ಘಟನೆ ಬುಧವಾರ  ಸಂಭವಿಸಿದೆ.
ಬೆಂಕಿ ಸ್ಪರ್ಶವಾದ ಕೂಡಲೇ ವಾಹನದಲ್ಲಿದ್ದ ಚಾಲಕ ಮತ್ತು ಇತರ ಇಬ್ಬರು ಹೊರಗಿಳಿದಿದ್ದು, ಅಪಾಯದಿಂದ ಪಾರಾಗಿದ್ದಾರೆ.  

ಶಾಂತಿ ನಗರ ರಸ್ತೆಯ ಮೂಲಕ ಬಂದ ವಾಹನ ಕಿನ್ನೆತ್ತಿಪಳಿಕೆ ಸಮೀಪಿಸುತ್ತಿದ್ದಂತೆ ವಿದ್ಯುತ್‌ ತಂತಿಗಳು ಬೈ ಹುಲ್ಲಿಗೆ ಸ್ಪರ್ಶಿಸಿ ಬೆಂಕಿ ಸ್ಪರ್ಶವಾಯಿತು. ಕೂಡಲೇ ಇಡೀ ವಾಹನವನ್ನು ಆವರಿಸಿಕೊಂಡಿತು. ಘಟನೆ ನಡೆದ ಸ್ಥಳದಲ್ಲಿ ವಿದ್ಯುತ್‌ ತಂತಿಗಳು ಜೋತಾಡುತ್ತಿದ್ದು, ರಸ್ತೆ ಮತ್ತು ತಂತಿಗಳ ನಡುವಿನ ಅಂತರ ಕಡಿಮೆ ಇದ್ದುದೇ ದುರಂತಕ್ಕೆ ಕಾರಣವೆನ್ನಲಾಗಿದೆ.  ಪುತ್ತೂರು ಅಗ್ನಿಶಾಮಕ ದಳದವರು ಧಾವಿಸಿ ಸ್ಥಳೀಯರ ನೆರವಿನೊಂದಿಗೆ ಬೆಂಕಿಯನ್ನು ನಂದಿಸಿದ್ದಾರೆ.