Advertisement
ಹಣಕಾಸಿನ ತೊಂದರೆ, ರೋಗಕ್ಕೆ ತುತ್ತಾಗುವ ಭಯ, ಉದ್ಯೋಗ ನಷ್ಟ, ದೈನಂದಿನ ಗಳಿಕೆಯ ಕುಸಿತ, ಇನ್ನಿತರ ವ್ಯಯಕ್ತಿಕ ಕಾರಣ ಹೀಗೆ ಒತ್ತಡ ಮನಸ್ಸನ್ನು ಘಾಸಿಗೊಳಿಸುವ ಘಟನೆ ಹಲವರ ಜೀವನದಲ್ಲಿ ನಡೆಯುತ್ತಿದೆ. ಅಸಮರ್ಪಕ ನಿದ್ರೆ, ಅನಾರೋಗ್ಯ ಇತ್ಯಾದಿ ದೈಹಿಕ ಅಂಶಗಳು ಒತ್ತಡಕ್ಕೆ ಕಾರಣವಾಗಿರಬಹುದು. ಇದರಿಂದ ಯಾವೆಲ್ಲಾ ಪರಿಣಾಮವನ್ನು ನಾವು ಎದುರಿಸಬೇಕಾಗುತ್ತದೆ ಎಂಬುದನ್ನು ನಾವು ಯೋಚಿಸಿಯೂ ಇರುವುದಿಲ್ಲ. ಈ ಚಿಕ್ಕ ಚಿಕ್ಕ ಒತ್ತಡಗಳೇ ನಮ್ಮ ಹೃದಯದ ಆರೋಗ್ಯದ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ. ಅದಲ್ಲದೆ ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ದೊರೆಯದಿದ್ದಲ್ಲಿ ಅದಕ್ಕೆ ದುಪ್ಪಟ್ಟು ಬೆಲೆ ತೆರಬೇಕಾದೀತು.
ಹೃದಯದ ಮೇಲೆ ಒತ್ತಡದಿಂದಾಗುವ ಹಾನಿಕಾರಕ ಪರಿಣಾಮ ತಡೆಯಲು ದಿನ ನಿತ್ಯ 30 ನಿಮಿಷಗಳ ಕಾಲ ವ್ಯಾಯಾಮ ಮಾಡುವುದರಿಂದ ತೂಕವನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳಬಹುದುದಲ್ಲದೆ ಕೊಲೆಸ್ಟ್ರಾಲ್‌ ಅನ್ನು ನಿಯಂತ್ರಿಸಬಹುದು. ಅದಲ್ಲದೆ ನಿಯಮಿತ ವ್ಯಾಯಾಮ ಖಿನ್ನತೆಯಿಂದ ದೂರವಿರಲು ಸಹಾಯ ಮಾಡುತ್ತದೆ. ಇದು ಹೃದಯಕ್ಕೆ ಒಂದು ರೀತಿಯಲ್ಲಿ ಸಹಾಯವಾಗುತ್ತದೆ ಎಂದು ಹೇಳಬಹುದು. ಸಂಶೋಧನೆಯ ಪ್ರಕಾರ ದೀರ್ಘಾವಧಿಯ ಆತಂಕ ಭಾವನಾತ್ಮಕ ಒತ್ತಡ ಹಠಾತ್‌ ಹೃದಾಯಾಘಾತಕ್ಕೆ ಕಾರಣವಾಗುತ್ತದೆ. ನೀವು ಖಿನ್ನತೆಗೆ ಒಳಗಾಗಿದ್ದಲ್ಲಿ ವೈದ್ಯಕೀಯ ಚಿಕಿತ್ಸೆ ಪಡೆದುಕೊಳ್ಳಿ. ಆತಂಕ ಕಡಿಮೆ ಮಾಡುವ ಯೋಗ ಇಲ್ಲವಾದಲ್ಲಿ ವಾಕಿಂಗ್‌ ಹೀಗೆ ಇನ್ನಿತರ ಹೊಸ ಚಟುವಟಿಕೆಗಳನ್ನು ಆರಂಭಿಸಿ. ಆದರೆ ಯಾವುದೇ ಕಾರಣಕ್ಕೂ ಆಲ್ಕೋಹಾಲ್‌, ತಂಬಾಕು ಇವುಗಳ ಮೋರೆ ಹೋಗಬೇಡಿ ಏಕೆಂದರೆ ಅವುಗಳಿಂದ ಯಾವುದೇ ರೀತಿಯ ಒಳ್ಳೆಯ ಪರಿಣಾಮ ಇಲ್ಲ. ಅಲ್ಲದೆ ಇವುಗಳಿಂದ ಆತಂಕದ ಭಾವನೆಗಳು ಹೆಚ್ಚಾಗಿ ರಕ್ತದೊತ್ತಡವನ್ನು ಹೆಚ್ಚಿಸುತ್ತದೆ.
Advertisement
ಒತ್ತಡದ ಕೆಲಸವನ್ನು ಸುಲಭಗೊಳಿಸಿಕಠಿನವಾದ ಕೆಲಸಗಳು ಒತ್ತಡವನ್ನು ಹೆಚ್ಚು ಮಾಡುತ್ತದೆ ಇದು ಹೃದಯಕ್ಕೆ ಅಪಾಯ ಉಂಟು ಮಾಡುತ್ತದೆ ಎಂಬುದು ವರದಿಯ ಪ್ರಕಾರ ಧೃಡ ಪಟ್ಟಿದೆ. ಕಳೆದ ಮೂರು ದಶಕಗಳಲ್ಲಿ 40 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಲ್ಲಿ ಹೃದ್ರೋಗ ಆವರ್ತನ ಸುಮಾರು ಮೂರು ಪಟ್ಟು ಹೆಚ್ಚಾಗಿದೆ. ಅದಲ್ಲದೆ ಯುವ ಸಮುದಾಯದಲ್ಲಿ ಹೃದಯಾಘಾತ 3ರಿಂದ 4 ಪಟ್ಟು ಹೆಚ್ಚಾಗಿದೆ ಎಂದು ವರದಿಯಲ್ಲಿ ಉಲ್ಲೇಖೀಸಲಾಗಿದೆ. ಗಂಟೆಗಳ ಲೆಕ್ಕಾಚಾರವಿಲ್ಲದೆ ಕೆಲಸ ಮಾಡುವುದು ಮತ್ತು ಅನಾರೋಗ್ಯಕರ ಆಹಾರ ಪದ್ಧತಿಯಿಂದಾಗಿ ಯುವಕರು ತಮ್ಮ ವಯಸ್ಸಿಗಿಂತ ಹೆಚ್ಚು ದೊಡ್ಡವರಾಗಿ ಕಾಣುತ್ತಾರೆ ಎಂಬುದು ಕೂಡ ಹಲವು ವರದಿಗಳಿಂದ ಸಾಬೀತಾಗಿದೆ. ಆದ್ದರಿಂದ ಆದಷ್ಟು ಒಳ್ಳೆಯ ಆಹಾರ ಪದ್ಧತಿಗಳನ್ನು ರೂಢಿಸಿಕೊಂಡು, ಒತ್ತಡಗಳನ್ನು ನಿಯಂತ್ರಣದಲ್ಲಿರಿಸಿಕೊಳ್ಳಲು ಪ್ರಯತ್ನ ಪಡಬೇಕಾಗಿದೆ.