ಎಂಬಿಬಿಎಸ್ ಓದುತ್ತಿದ್ದ ಶ್ರೀ ಲೀಲಾಗೊಲಿದ `ಕಿಸ್’ಛಾನ್ಸ್!

ಶ್ರೀ ಲೀಲಾ ಎಂಬ ಪ್ರತಿಭಾವಂತ ನಟಿ ಎ.ಪಿ ಅರ್ಜುನ್ ನಿರ್ದೇಶನದ ಕಿಸ್ ಚಿತ್ರದ ಮೂಲಕ ನಾಯಕಿಯಾಗಿ ಪಾದಾರ್ಪಣೆ ಮಾಡಿದ್ದಾರೆ. ಆಕಸ್ಮಿಕವೆಂಬಂತೆ ಈ ಸಿನಿಮಾದಲ್ಲಿ ನಾಯಕಿಯಾಗೋ ಅವಕಾಶ ಪಡೆದುಕೊಂಡಿರೋ ಶ್ರೀಲೀಲಾ ಪಾಲಿಗೆ ಈ ಚಿತ್ರವಿನ್ನೂ ತೆರೆ ಕಾಣೋ ಮೊದಲೇ ಭರಾಟೆ ಚಿತ್ರದಲ್ಲಿ ಶ್ರೀ ಮುರುಳಿಗೆ ನಾಯಕಿಯಾಗೋ ಅದೃಷ್ಟವೂ ಒಲಿದಿದೆ. ಮೊದಲ ಸಿನಿಮಾ ಬಿಡುಗಡೆಗೂ ಮುನ್ನವೇ ಇಂಥಾ ಅದ್ಭುತ ಅವಕಾಶಗಳನ್ನು ಗಿಟ್ಟಿಸಿಕೊಳ್ಳೊವ ಮೂಲಕ ಶ್ರೀ ಲೀಲಾ ಅದೃಷ್ಟದ ಹುಡುಗಿಯಾಗಿಯೂ ಬಿಂಬಿತರಾಗಿದ್ದಾರೆ.

ಮೂಲತಃ ಬೆಂಗಳೂರಿನ ಹುಡುಗಿಯಾದ ಶ್ರೀ  ಲೀಲಾ ಡಾಕ್ಟರ್ ಆಗೋ ಕನಸಿಟ್ಟುಕೊಂಡು ಸಾಗಿ ಬಂದು ಎಂಬಿಬಿಎಸ್ ವ್ಯಾಸಂಗ ಮಾಡುತ್ತಿರೋ ಹುಡುಗಿ. ಪಕ್ಕಾ ಅಮ್ಮನ ಮಗಳಾದ ಈಕೆಯ ಪಾಲಿಗೆ ಸಿನಿಮಾ ನಾಯಕಿಯಾಗಬೇಕೆನ್ನುವ ದೂರದ ಆಸೆ ಇದ್ದರೂ ಡಾಕ್ಟರ್ ಆಗೋ ಕನಸನ್ನೇ ಪ್ರಧಾನವಾಗಿಸಿಕೊಂಡು ಮುಂದುವರೆಯುತ್ತಿದ್ದವರು. ಆದರೆ ಎಂಬಿಬಿಎಸ್ ಓದುತ್ತಿರೋ ಹೊತ್ತಿನಲ್ಲಿಯೇ ಅವರ ಪಾಲಿಗೆ ಅಚಾನಕ್ಕಾಗಿ ಕಿಸ್ ನಾಯಕಿಯಾಗೋ ಅವಕಾಶ ಒಲಿದು ಬಂದಿತ್ತು.

ಶ್ರೀ ಲೀಲಾ ಪಾಲಿಗೆ ಕಿಸ್ ಎಂಬುದು ಕೇವಲ ಮೊದಲ ಹೆಜ್ಜೆಯಲ್ಲ. ಅದು ಅವರನ್ನು ನಟಿಯಾಗಿ ರೂಪುಗೊಳಿಸಿದ ಪಾಠಶಾಲೆ. ನಿರ್ದೇಶಕ ಅರ್ಜುನ್ ಪ್ರತೀ ಹಂತದಲ್ಲಿಯೂ ತಿಳಿ ಹೇಳುತ್ತಾ, ನಟನೆಯ ಪಟ್ಟುಗಳನ್ನು ಕಲಿಸುತ್ತಾ ಸಾಗಿದ ರೀತಿಯ ಬಗ್ಗೆ ಶ್ರೀ ಲೀಲಾರಲ್ಲೊಂದು ಹೆಮ್ಮೆಯಿದೆ. ಈಕೆ ಏನೇ ಹೇಳಿದರೂ ತಕ್ಷಣಕ್ಕೆ ತಿಳಿದುಕೊಂಡು, ತಿದ್ದಿಕೊಂಡು ಲವ ಲವಿಕೆಯಿಂದ ಈ ಪಾತ್ರವನ್ನು ನಿರ್ವಹಿಸಿದ ಬಗ್ಗೆ ಚಿತ್ರತಂಡದಲ್ಲೊಂದು ಹೆಮ್ಮೆಯಿದೆ. ಈಕೆ ಅಷ್ಟೊಂದು ಶ್ರದ್ಧೆಯಿಂದ ನಟಿಸದೇ ಇದ್ದಿದ್ದರೆ ಭರಾಟೆಯಂಥಾ ಚಿತ್ರಕ್ಕೆ ನಾಯಕಿಯಾಗೀ ಅವಕಾಶ ಸಿಗಲು ಸಾಧ್ಯವಾಗುತ್ತಿರಲಿಲ್ಲ. ಶ್ರೀ ಲೀಲಾ ಪಾಲಿನ ಮೊದಲ ಹೆಜ್ಜೆಯಂಥಾ ಕಿಸ್ ಇದೇ ತಿಂಗಳ 27 ರಂದು ಬಿಡುಗಡೆಯಾಗಲಿದೆ.