ಮಹಾರಾಷ್ಟ್ರದಿಂದ ಬಂದ ಕಾರ್ಮಿಕರಿಗೆ ಪ್ರತ್ಯೇಕ ನಿಗಾ

ಕೆಂಭಾವಿ: ಮಹಾರಾಷ್ಟ್ರದಿಂದ ಟ್ರ್ಯಾಕ್ಟರ್ ಗಳ ಮೂಲಕ ಏವೂರು ತಾಂಡಾಕ್ಕೆ ತೆರಳಿದ ಕಾರ್ಮಿಕರನ್ನು ಪ್ರತ್ಯೇಕವಾಗಿರಿಸಿ ನಿಗಾವಹಿಸಲಾಗಿದೆ.

ಕೆಂಭಾವಿ ಹತ್ತಿರದ ಏವೂರ ತಾಂಡಾದ ಸುಮಾರು 50ಕ್ಕೂ ಹೆಚ್ಚು ಜನರು ದುಡಿಯಲು ಮಹಾರಾಷ್ಟ್ರದ ಜತ್‌ ಸೇರಿದಂತೆ ಇನ್ನಿತರ ಪ್ರದೇಶಗಳಗೆ ತೆರಳಿದ್ದರು. ಆದರೇ ಮಹಾರಾಷ್ಟ್ರದಲ್ಲಿ ಏನು ಸಿಗದೇ ನೀರು, ಆಹಾರಕ್ಕಾಗಿ ಚಿಕ್ಕ ಚಿಕ್ಕ ಮಕ್ಕಳೊಂದಿಗೆ ಪರದಾಡುತ್ತಿದ್ದ ಜನರು ಹೇಗಾದರೂ ಮಾಡಿ ತಮ್ಮ ಊರಿಗೆ ಸೇರಬೇಕು ಎಂದು ಪ್ರಯಾಣಿಸಿದ್ದರು. ಅಲ್ಲದೇ ಇತರೆ ಕಡೆಗಳಿಂದ ಬಂದ ಕಾರ್ಮಿಕರಿಗೆ ಆಹಾರ ನೀರು ಸಿಗದೇ ಪರದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಗ್ರಾಮಕ್ಕೆ ಸೇರಬೇಕು ಎಂದು ಮರಳಿದರೂ ಇನ್ನು ಮನೆಗೆ ಸೇರದದಂತಾಗಿದೆ.

ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಹಸಿವಿನಿಂದ ಕಂಗೆಟ್ಟು ತಮ್ಮ 13 ಮಕ್ಕಳೊಂದಿಗೆ ಯಾರಿಗೂ ತಿಳಿಸದೆ ಹೆದರಿ ಕಾಲುವೆ ಪಕ್ಕದ ರಸ್ತೆ ಮೂಲಕ ಬಾಡಿಗೆಗೆ ಟ್ರ್ಯಾಕ್ಟರ್ ನಲ್ಲಿ ಪ್ರಯಾಣಿಸಿದ್ದರು ಎನ್ನಲಾಗಿದೆ. ತಾಂಡಾ ನಿವಾಸಿಗಳು ರೆಡ್‌ ಝೋನ್‌ನಿಂದ ಆಗಮಿಸಿದ್ದು ಸಾಕಷ್ಟು ಮುಂಜಾಗ್ರತೆ ವಹಿಸುವ ಅಗತ್ಯ ಇರುವ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಮುನ್ನೆಚ್ಚರಿಕೆಯಾಗಿ ಪ್ರತ್ಯೇಕವಾಗಿರಿಸಿದೆ.

ಸದ್ಯ ಅಧಿಕಾರಿಗಳು ಕೆಂಭಾವಿ ಮುಖ್ಯ ರಸ್ತೆಯಲ್ಲಿರುವ ಆಶ್ರಮದಲ್ಲಿ ಪ್ರತ್ಯೇಕವಾಗಿ ಇರಿಸಿದ್ದಾರೆ. ಆರೋಗ್ಯ ಇಲಾಖೆ ಸಿಬ್ಬಂದಿ ವಲಸಿಗರ ಆರೋಗ್ಯ ಪರೀಕ್ಷೆ ನಡೆಸಿದ್ದು, ವಸತಿ ಮತ್ತು ಆಹಾರದ ವ್ಯವಸ್ಥೆ ಮಾಡಲಾಗಿದೆ ಎಂದು ಕಂದಾಯ ಅಧಿಕಾರಿ ತಿಳಿಸಿದ್ದಾರೆ. ಹಿರಿಯ ಅಧಿಕಾರಿಗಳು ಬಂದ ನಂತರ ಮರಳಿ ಅವರ ಮನೆಗೆ ತಲುಪಿಸಿ ಮನೆಯಲ್ಲಿಯೆ ಕ್ವಾರಂಟೈನ್‌ ಗೆ ಒಳಪಡಿಸಲಾಗುವುದು ಎಂದು ತಿಳಿಸಿದ್ದಾರೆ.