ಕಾತ್ರಜ್‌ ಅಯ್ಯಪ್ಪದೇವಸ್ಥಾನ: ಶಿವರಾತ್ರಿ ಉತ್ಸವ

ಪುಣೆ: ಕಾತ್ರಜ್‌ ಶ್ರೀ ಅಯ್ಯಪ್ಪ ಸ್ವಾಮಿ ದೇವಸ್ಥಾನದಲ್ಲಿ ಫೆ. 24ರಂದು   ಶಿವರಾತ್ರಿ  ಉತ್ಸವವು  ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಜರಗಿತು. 

ಧಾರ್ಮಿಕ ಕಾರ್ಯಕ್ರಮವಾಗಿ  ಬೆಳಗ್ಗೆ 7ರಿಂದ ರಾತ್ರಿ 8ರವರೆಗೆ ಶ್ರೀ  ಈಶ್ವರ ದೇವರಿಗೆ ರುದ್ರಾಭಿಷೇಕ ಮತ್ತು ವೈವಿಧ್ಯಮಯ ಪೂಜೆಗಳು ಮಂದಿರದ ಪ್ರಧಾನ  ಅರ್ಚಕ  ಹರೀಶ್‌ ಭಟ್‌ ಅವರ  ನೇತೃತ್ವದಲ್ಲಿ ಜರಗಿತು. ರಾತ್ರಿ 8ರಿಂದ ವಿಶೇಷ ದಿನದ  ಸಲುವಾಗಿ ದೇವರಿಗೆ ರಂಗಪೂಜೆ, ಮಹಾಮಂಗಳಾರತಿ ನೆರವೇರಿತು.

ಶಿವರಾತ್ರಿ  ಪ್ರಯುಕ್ತ  ಅಯ್ಯಪ್ಪ  ಸ್ವಾಮಿ ಮಂದಿರದಲ್ಲಿ   ಅಪರಾಹ್ನ 3ರಿಂದ  ಮೊದಲ್ಗೊಂಡು ಮಧ್ಯ ರಾತ್ರಿ 12ರವರೆಗೆ ನಗರದ  ವಿವಿದ ಭಜನಾ ಮಂಡಳಿಯವರಿಂದ ಭಜನ  ಕಾರ್ಯಕ್ರಮ ಜರಗಿತು. ಭಜನ ಕಾರ್ಯಕ್ರಮದಲ್ಲಿ ಅಯ್ಯಪ್ಪ ಮಂದಿರದ ಭಜನ ಮಂಡಳಿ, ಬಿಲ್ಲವ ಸಮಾಜ ಸೇವಾ ಸಂಘ ಭಜನ ಮಂಡಳಿ, ದೇವಾಡಿಗ ಸೇವಾ ಸಂಘ ಭಜನ ಮಂಡಳಿ, ಅಯ್ಯಪ್ಪ ಯಕ್ಷಗಾನ ಭಜನ ಮಂಡಳಿ, ಕಾಪಿ ಹೌಸ್‌ ಭಜನ ಮಂಡಳಿ, ರಾಜ್‌ಮಹಲ್‌ ಭಜನ ಮಂಡಳಿಯವರು ಪಾಲ್ಗೊಂಡಿದ್ದರು.

ಅನಂತರ ಅಯ್ಯಪ್ಪ ಭಜನ ಮಂಡಳಿಯವರೊಂದಿಗೆ ವಿವಿಧ
ಮಂಡಳಿಯ ಸದಸ್ಯರ ಸಹಕಾರದೊಂದಿಗೆ ಕುಣಿತ ಭಜನೆಯು ಸೇರಿದ ಭಕ್ತಾದಿಗಳನ್ನು ರಂಜಿಸಿತು. ಅಯ್ಯಪ್ಪ ಭಜನ ಮಂಡಳಿಯ ಮುಖ್ಯಸ್ಥ ಭಾಸ್ಕರ್‌ ಕೊಟ್ಟಾರಿ ಅವರ ಮುಂದಾಳತ್ವದಲ್ಲಿ ರಾತ್ರಿ 12ರಿಂದ ಜರಗಿದ ಈ ಭಜನ ಕಾರ್ಯಕ್ರಮವು ಸೇರಿದ ಎಲ್ಲರ ಮಂಗಳ ಹಾಡಿನ ಮೂಲಕ ಮುಕ್ತಾಯಗೊಂಡಿತು. ಹೆಚ್ಚಿನ ಸಂಖ್ಯೆಯ ಭಕ್ತಾದಿಗಳು ಬೆಳಗ್ಗಿನಿಂದ ರಾತ್ರಿಯವರೆಗೆ ಮಂದಿರಕ್ಕೆ ಭೇಟಿ ನೀಡಿ ದೇವರ ದರ್ಶನ ಪಡೆದು ಪೂಜೆ ಸಲ್ಲಿಸಿದರು. ಈ ಸಂದರ್ಭದಲ್ಲಿ ಮಂದಿರದಲ್ಲಿ ಉಪಾಹಾರ ಮತ್ತು ಅನ್ನದಾನ ನಡೆಯಿತು.

ಶ್ರೀ ಅಯ್ಯಪ್ಪ ಮಂದಿರ ಕಾತ್ರಜ್‌ ಇದರ ವಿಶ್ವಸ್ತ ಮಂಡಳಿಯ ಅಧ್ಯಕ್ಷ  ಸುಭಾಷ್‌ ಶೆಟ್ಟಿ  ಮತ್ತು ಪದಾಧಿಕಾರಿಗಳು, ಕಾರ್ಯಕಾರಿ ಸಮಿತಿಯ ಮುಖ್ಯಸ್ಥರು, ಸದಸ್ಯರು, ಮಹಿಳಾ ಸಮಿತಿಯ ಮುಖ್ಯಸ್ಥರು ಮತ್ತು ಸದಸ್ಯರು, ಭಕ್ತಾದಿಗಳು ಉಪಸ್ಥಿತರಿದ್ದು ಉತ್ಸವದ ಯಶಸ್ಸಿಗೆ ಸಹಕರಿಸಿದರು. ಚಿತ್ರ-ವರದಿ:        

  ಹರೀಶ್‌ ಮೂಡಬಿದ್ರೆ ಪುಣೆ