ಕಾಸರಗೋಡು: ಹೊಸ ಪ್ರಕರಣ ಇಲ್ಲ

ಕಾಸರಗೋಡು: ಕಾಸರಗೋಡು ಜಿಲ್ಲೆಯಲ್ಲಿ ರವಿವಾರ ಹೊಸ ಕೋವಿಡ್ 19 ಪ್ರಕರಣ ದಾಖಲಾಗಿಲ್ಲ. ಇದೇ ವೇಳೆ ಒಬ್ಬರು ಗುಣಮುಖರಾಗಿದ್ದಾರೆ.

ಜಿಲ್ಲೆಯಲ್ಲಿ ಈವರೆಗೆ 175 ಮಂದಿಯಲ್ಲಿ ಕೋವಿಡ್ 19 ದೃಢವಾಗಿದ್ದು, 160 ಮಂದಿ ಗುಣಮುಖರಾಗಿದ್ದಾರೆ. 15 ಮಂದಿ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಉಕ್ಕಿನಡ್ಕದ ಕಾಸರಗೋಡು ಮೆಡಿಕಲ್‌ ಕಾಲೇಜಿನಿಂದ ಇವರು ಬಿಡುಗಡೆಗೊಂಡಿದ್ದಾರೆ.

ಕೇರಳದಲ್ಲಿ 11 ಮಂದಿಗೆ ಸೋಂಕು
ಇಡುಕ್ಕಿ ಜಿಲ್ಲೆಯ 6 ಮಂದಿ ಮತ್ತು ಕೋಟ್ಟಯಂ ಜಿಲ್ಲೆಯ ಐವರು ಸೇರಿದಂತೆ ಕೇರಳದಲ್ಲಿ ರವಿವಾರ ಒಟ್ಟು 11 ಮಂದಿಗೆ ಸೋಂಕು ದೃಢ ವಾಗಿದೆ. ಇಡುಕ್ಕಿಯ 6 ಮಂದಿಯಲ್ಲಿ ಒಬ್ಬರು ವಿದೇಶದಿಂದ (ಸ್ಪೈನ್‌) ಬಂದವರು. ಇಬ್ಬರು ತಮಿಳುನಾಡಿನಿಂದ ಬಂದವರು. ಮೂವರಿಗೆ ಸಂಪರ್ಕದ ಮೂಲಕ ರೋಗ ಬಾಧಿಸಿದೆ. ಇದರಲ್ಲಿ ಒಬ್ಬರು ವೈದ್ಯರು. ಕೋಟ್ಟಯಂ ಜಿಲ್ಲೆಯ ಬಾಧಿತರಲ್ಲಿ ಒಬ್ಬರು ಅನ್ಯ ರಾಜ್ಯದಿಂದ ಬಂದವರು. ನಾಲ್ವರಿಗೆ ಸಂಪರ್ಕದ ಮೂಲಕ ರೋಗ ಬಾಧಿಸಿದೆ. ಇವರಲ್ಲಿ ಇಬ್ಬರು ಆರೋಗ್ಯ ಕಾರ್ಯಕರ್ತರಿದ್ದಾರೆ.

56 ಪ್ರಕರಣ ದಾಖಲು
ಲಾಕ್‌ಡೌನ್‌ ನಿಯಮ ಉಲ್ಲಂಘಿಸಿದ ಆರೋಪದಲ್ಲಿ ಕಾಸರಗೋಡು ಜಿಲ್ಲೆಯಲ್ಲಿ ರವಿವಾರ 56 ಪ್ರಕರಣಗಳನ್ನು ದಾಖಲಿಸಿಕೊಳ್ಳಲಾಗಿದೆ. 96 ಮಂದಿಯನ್ನು ಬಂಧಿಸಿ, 26 ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಜಿಲ್ಲೆಯಲ್ಲಿ ಈ ವರೆಗೆ 1,809 ಪ್ರಕರಣಗಳನ್ನು ದಾಖಲಿಸಲಾಗಿದೆ. 2,176 ಮಂದಿಯನ್ನು ಬಂಧಿಸಿ, 736 ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ.