Kasaragod: ಹಳಿಯಲ್ಲಿ ಸಿಲುಕಿದ ಸರಕು ರೈಲು: ಗೇಟು ತೆರೆಯದೆ ಸಂಚಾರ ಅಸ್ತವ್ಯಸ್ತ

ಕಾಸರಗೋಡು: ಕೋಟಿಕುಳಂ ರೈಲು ನಿಲ್ದಾಣದಲ್ಲಿ ಸರಕು ಹೇರಿ ಬಂದ ರೈಲು ಹಳಿಯಲ್ಲೇ ಸಿಲುಕಿಕೊಂಡ ಪರಿಣಾಮ ರೈಲ್ವೇ ಗೇಟನ್ನು ತೆರೆಯದೆ ಸಾರಿಗೆ ಸಂಚಾರ ಗಂಟೆಗಳ ತನಕ ಅಸ್ತವ್ಯಸ್ತಗೊಂಡ ಘಟನೆ ಸೆ. 25ರಂದು ರಾತ್ರಿ ನಡೆದಿದೆ.

ಇಂಧನ ಹೇರಿಕೊಂಡು ಬಂದ ಸರಕು ರೈಲು ಕೋಟಿಕುಳಂ ನಿಲ್ದಾಣಕ್ಕೆ ಬಂದಾಗ ಅದರ ಎಂಜಿನ್‌ ದಿಢೀರ್‌ ಕೈಕೊಟ್ಟಿದೆ. ಇದರಿಂದಾಗಿ ಆ ರೈಲು ಮುಂದಕ್ಕೆ ಸಾಗಲು ಸಾಧ್ಯವಾಗದೆ ರೈಲು ನಿಲ್ದಾಣದ ಒಂದನೇ ಫ್ಲಾಟ್‌ ಫಾಂನಲ್ಲಿ ಮತ್ತು ಕೋಟಿಕುಳಂ ರೈಲ್ವೇ ಗೇಟಿನ ಮಧ್ಯಭಾಗದಲ್ಲಿ ಸಿಲುಕಿಕೊಂಡಿದೆ.

ಇದರಿಂದಾಗಿ ರೈಲ್ವೇ ಗೇಟನ್ನು ತೆರೆಯಲು ಸಾಧ್ಯವಾಗಲಿಲ್ಲ. ಇದರಿಂದ ವಾಹನಗಳು ಮತ್ತು ಜನರು ರೈಲ್ವೇ ಗೇಟ್‌ನ ಮೂಲಕ ಸಾಗಲು ಸಾಧ್ಯವಾಗದೆ ಗಂಟೆಗಳ ಕಾಲ ಅಲ್ಲೇ ಉಳಿದು ತೀವ್ರ ಸಂಕಷ್ಟಕ್ಕೆ ಸಿಲುಕಬೇಕಾಯಿತು. ರೈಲ್ವೇ ಮೆಕಾನಿಕ್‌ಗಳು ಬಂದು ಸರಿಪಡಿಸಿದ ಬಳಿಕ ಸರಕು ರೈಲು ಸಂಚಾರ ಮುಂದುವರಿಯಿತು.