Syed Mushtaq Ali Trophy ಸಿಕ್ಕಿಂ ವಿರುದ್ಧ ಕರ್ನಾಟಕಕ್ಕೆ ಸುಲಭ ಜಯ

ಇಂದೋರ್‌: ಸಯ್ಯದ್‌ ಮುಷ್ತಾಕ್‌ ಅಲಿ ಟ್ರೋಫಿ ಟಿ20 ಪಂದ್ಯಾವಳಿಯ ಶುಕ್ರವಾರದ ಮುಖಾಮುಖೀಯಲ್ಲಿ ಕರ್ನಾಟಕ 8 ವಿಕೆಟ್‌ಗಳಿಂದ ಸಿಕ್ಕಿಂ ತಂಡಕ್ಕೆ ಸೋಲುಣಿಸಿದೆ. ಇದು 4 ಪಂದ್ಯಗಳಲ್ಲಿ ಕರ್ನಾಟಕ ಸಾಧಿಸಿದ 2ನೇ ಜಯ.

ಮೊದಲು ಬ್ಯಾಟಿಂಗ್‌ ನಡೆಸಿದ ಸಿಕ್ಕಿಂ 18.2 ಓವರ್‌ಗಳಲ್ಲಿ 82ಕ್ಕೆ ಉರುಳಿದರೆ, ಕರ್ನಾಟಕ ಕೇವಲ 5.4 ಓವರ್‌ಗಳಲ್ಲಿ 2 ವಿಕೆಟಿಗೆ 86 ರನ್‌ ಮಾಡಿತು. ಇದರಿಂದ ತಂಡದ ರನ್‌ರೇಟ್‌ನಲ್ಲಿ ಸಾಕಷ್ಟು ಪ್ರಗತಿ ಯಾಯಿತು. ಆದರೆ ಅಂಕಪಟ್ಟಿಯಲ್ಲಿ ಕರ್ನಾಟಕ 5ರಷ್ಟು ಕೆಳಸ್ಥಾನದಲ್ಲಿದೆ (4 ಅಂಕ, 1.702 ರನ್‌ರೇಟ್‌). ಕರ್ನಾಟಕವಿನ್ನು ತಮಿಳುನಾಡು, ಬರೋಡ ಮತ್ತು ಗುಜರಾತ್‌ನಂಥ ಬಲಿಷ್ಠ ತಂಡಗಳನ್ನು ಎದುರಿಸಬೇಕಿದೆ.
ಶ್ರೇಯಸ್‌ ಗೋಪಾಲ್‌ 5 ವಿಕೆಟ್‌ ಉಡಾಯಿಸಿ ಸಿಕ್ಕಿಂಗೆ ಬಲವಾದ ಆಘಾತವಿಕ್ಕಿದರು. ವಿದ್ಯಾಧರ ಪಾಟೀಲ್‌ 3 ಮತ್ತು ವಿಜಯ್‌ಕುಮಾರ್‌ ವೈಶಾಖ್‌ 2 ವಿಕೆಟ್‌ ಉರು ಳಿಸಿದರು. 18 ರನ್‌ ಮಾಡಿದ ಆಶಿಷ್‌ ಥಾಪಾ ಸಿಕ್ಕಿಂ ಸರದಿಯ ಗರಿಷ್ಠ ಸ್ಕೋರರ್‌.

ನಾಯಕ ಅಗರ್ವಾಲ್‌ 2ನೇ ಎಸೆತದಲ್ಲೇ ಖಾತೆ ತೆರೆಯದೆ ನಿರ್ಗಮಿಸಿದರೆ, ಆರಂಭಿಕನಾಗಿ ಇಳಿದ ಮನೀಷ್‌ ಪಾಂಡೆ ಅಜೇಯ 30 ರನ್‌ ಹೊಡೆದರು. ಕೀಪರ್‌ ಕೃಷ್ಣನ್‌ ಶ್ರೀಜಿತ್‌ 37, ಸ್ಮರಣ್‌ ರವಿಚಂದ್ರನ್‌ ಅಜೇಯ 19 ರನ್‌ ಮಾಡಿದರು.

ಎಲ್ಲ 11 ಆಟಗಾರರಿಂದ ಬೌಲಿಂಗ್‌!
ಮುಂಬಯಿ: ಮಣಿಪುರ ವಿರುದ್ಧದ ಪಂದ್ಯದಲ್ಲಿ ದಿಲ್ಲಿಯ ಎಲ್ಲ 11 ಮಂದಿ ಆಟಗಾರರು ಬೌಲಿಂಗ್‌ ನಡೆಸಿದ್ದು ವಿಶೇಷವಾಗಿತ್ತು. ನಾಯಕ ಆಯುಷ್‌ ಬದೋನಿ ಅವರ ಈ ಅಚ್ಚರಿಯ ನಿರ್ಧಾರದಿಂದಾಗಿ ವಿಕೆಟ್‌ ಕೀಪರ್‌ ಅನುಜ್‌ ರಾವತ್‌ ಕೂಡ ಬೌಲಿಂಗ್‌ ನಡೆಸುವ ಅವಕಾಶ ಪಡೆದರು. ಮೂವರು ತಲಾ 3 ಓವರ್‌, ಮತ್ತೆ ಮೂವರು ತಲಾ 2 ಓವರ್‌, 5 ಮಂದಿ ಒಂದೊಂದು ಓವರ್‌ ಎಸೆದರು. ಇದರಲ್ಲಿ 2 ಓವರ್‌ ಮೇಡನ್‌ ಆಗಿತ್ತು.

ಶಾರ್ದೂಲ್‌ ದುಬಾರಿ ಬೌಲಿಂಗ್‌
ಹೈದರಾಬಾದ್‌: ಮುಂಬಯಿ ಬೌಲರ್‌ ಶಾರ್ದೂಲ್‌ ಠಾಕೂರ್‌ ಈ ಪಂದ್ಯಾವಳಿಯ ಇತಿಹಾಸದ ಅತ್ಯಂತ ದುಬಾರಿ ಬೌಲಿಂಗ್‌ ದಾಖಲೆಯನ್ನು ಸರಿದೂಗಿಸಿದರು. ಕೇರಳ ವಿರುದ್ಧದ ಪಂದ್ಯದಲ್ಲಿ ಅವರ 4 ಓವರ್‌ಗಳಲ್ಲಿ 69 ರನ್‌ ಸೋರಿ ಹೋಯಿತು. ಕೆಲವು ದಿನಗಳ ಹಿಂದೆ ಹರಿಯಾಣ ವಿರುದ್ಧ ಅರುಣಾಚಲ ಪ್ರದೇಶದ ರಮೇಶ್‌ ರಾಹುಲ್‌ ಕೂಡ ಇಷ್ಟೇ ರನ್‌ ನೀಡಿದ್ದರು. ಹಿಂದಿನ ದಾಖಲೆ ಹೈದರಾಬಾದ್‌ನ ಪಗಡಾಲ ನಾಯ್ಡು ಹೆಸರಲ್ಲಿತ್ತು (67ಕ್ಕೆ 1).
ಈ ಪಂದ್ಯವನ್ನು ಕೇರಳ 43 ರನ್ನುಗಳಿಂದ ಜಯಿಸಿತು. ಕೇರಳ 5 ವಿಕೆಟಿಗೆ 254 ರನ್‌ ಪೇರಿಸಿದರೆ, ಮುಂಬಯಿ 9ಕ್ಕೆ 191 ರನ್‌ ಮಾಡಿತು.