ICSE: ರಾಜ್ಯದ ವಿದ್ಯಾರ್ಥಿಗಳಿಗೆ‌ ಶೇ. 99 ಮೀರಿದ ಫ‌ಲಿತಾಂಶ; ವಿದ್ಯಾರ್ಥಿನಿಯರೇ ಮೇಲುಗೈ

ಬೆಂಗಳೂರು: ದಿಲ್ಲಿಯ ದಿ ಕೌನ್ಸಿಲ್‌ ಆಫ್‌ ಇಂಡಿಯನ್‌ ಸ್ಕೂಲ್‌ ಸರ್ಟಿಫಿಕೇಟ್‌ ಎಕ್ಸಾಮಿನೇಷನ್‌(ಐಎಸ್‌ಸಿಇ) ಐಸಿಎಸ್‌ಇ 10ನೇ ತರಗತಿ ಮತ್ತು ಐಎಸ್‌ಸಿ 12ನೇ ತರಗತಿಯ ಪರೀಕ್ಷೆಯ ಫಲಿತಾಂಶ ಸೋಮವಾರ ಪ್ರಕಟವಾಗಿದೆ.

ಹತ್ತನೇ ತರಗತಿಯ ಪರೀಕ್ಷೆಯಲ್ಲಿ ರಾಜ್ಯದ ವಿದ್ಯಾರ್ಥಿಗಳು ಶೇ. 99.83 ಮತ್ತು ಹನ್ನೆರಡನೇ ತರಗತಿ ಪರೀಕ್ಷೆಯಲ್ಲಿ ಶೇ. 99.49 ಫ‌ಲಿತಾಂಶ ಪಡೆದಿದ್ದಾರೆ.

ರಾಜ್ಯದಲ್ಲಿ ಐಸಿಎಸ್‌ಇ 405 ಮತ್ತು ಐಎಸ್‌ಸಿಯ 51 ಶಾಲೆಗಳಿಂದ ವಿದ್ಯಾರ್ಥಿ ಗಳು ಪರೀಕ್ಷೆಗೆ ಹಾಜರಾಗಿದ್ದರು. ಐಸಿಎಸ್‌ಇ ಪರೀಕ್ಷೆಗೆ 14,001 ಬಾಲಕರು ಮತ್ತು 13,778 ಬಾಲಕಿಯರು ಸಹಿತ ಒಟ್ಟು 27,826 ವಿದ್ಯಾರ್ಥಿಗಳು ಹಾಗೂ ಐಎಸ್‌ಸಿ ಪರೀಕ್ಷೆಗೆ 1,089 ಹುಡುಗರು ಮತ್ತು 1,263 ಹುಡುಗಿಯರು ಸೇರಿ 2,364 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು.

ವಿದ್ಯಾರ್ಥಿನಿಯರೇ ಮೇಲುಗೈ
ಎರಡೂ ಪರೀಕ್ಷೆಯಲ್ಲೂ ವಿದ್ಯಾರ್ಥಿನಿ ಯರೇ ಮೇಲುಗೈ ಸಾಧಿಸಿದ್ದಾರೆ. ಐಸಿಎಸ್‌ಇಯಲ್ಲಿ ಶೇ.99.93 ಬಾಲಕಿಯರು ಹಾಗೂ ಶೇ.99.73 ಬಾಲಕರು ತೇರ್ಗಡೆ ಆಗಿದ್ದಾರೆ. ಐಎಸ್‌ಸಿಯಲ್ಲಿ ಬಾಲಕಿಯರು ಶೇ.99.76 ಮತ್ತು ಬಾಲಕರು ಶೇ.99.18 ಉತ್ತೀರ್ಣರಾಗಿದ್ದಾರೆ.

ಬೆಂಗಳೂರಿನ ಮೂವರು ಐಸಿಎಸ್‌ಇ ಪರೀಕ್ಷೆಯಲ್ಲಿ ಶೇ.99.80 ಅಂಕ ಪಡೆದು ಪ್ರಥಮ ಸ್ಥಾನ ಪಡೆದಿದ್ದಾರೆ. ಗ್ರೀನ್‌ವುಡ್‌ ಹೈನದ ಅದ್ರಿತಾ ತ್ರಿಪಾಠಿ, ಸರ್ಜಾಪುರ ಶಾಖೆಯ ಬೆಥನಿ ಹೈನ ಮೆಹೆರ್‌ ಎಫ್‌.ಅನ್ಸಿಲ್‌ ಮತ್ತು ಬಿಷಪ್‌ ಕಾಟನ್‌ ಬಾಲಕರ ಶಾಲೆಯ ವರುಣ್‌ ಶೇ.99.80 ಅಂಕಗಳನ್ನು ಪಡೆದು ರಾಜ್ಯಕ್ಕೆ ಟಾಪರ್‌ ಆಗಿ ಹೊರಹೊಮ್ಮಿದ್ದಾರೆ. ಐಎಸ್‌ಸಿಯಲ್ಲಿ ಗ್ರೀನ್‌ವುಡ್‌ ಹೈ ಶಾಲೆಯ ಮೈಥಿಲಿ ಅಯ್ಯರ್‌ ಶೇ.98.75 ಅಂಕಗಳನ್ನು ಪಡೆದಿದ್ದಾರೆ.

ಐಸಿಎಸ್‌ಇ ಪರೀಕ್ಷೆಯನ್ನು 20 ಭಾರತೀಯ ಭಾಷೆಗಳು ಸಹಿತ ಒಟ್ಟು 60 ವಿಷಯಗಳಲ್ಲಿ ನಡೆಸಲಾಗಿತ್ತು. ಇದರಲ್ಲಿ 13 ವಿದೇಶಿ ಮತ್ತು 1 ಕ್ಲಾಸಿಕಲ್‌ ಭಾಷೆ ಕೂಡ ಸೇರಿದೆ. ಅದೇ ರೀತಿ ಐಎಸ್‌ಸಿ ಪರೀಕ್ಷೆಯನ್ನು 47 ವಿಷಯಗಳಲ್ಲಿ ನಡೆಸಿದ್ದು, ಇದರಲ್ಲಿ 12 ಭಾರತೀಯ, 4 ವಿದೇಶಿ ಮತ್ತು 2 ಕ್ಲಾಸಿಕಲ್‌ ಭಾಷೆ ಸೇರಿದೆ. 10ನೇ ತರಗತಿಗೆ ನೋಂದಾಯಿಸಿದ್ದ ವಿದ್ಯಾರ್ಥಿಗಳಲ್ಲಿ 47 ವಿದ್ಯಾರ್ಥಿಗಳು ಅನುತ್ತೀರ್ಣಗೊಂಡಿದ್ದಾರೆ.

10ನೇ ತರಗತಿಯಲ್ಲಿ ಪರಿಶಿಷ್ಟ ಜಾತಿ 1,734 ವಿದ್ಯಾರ್ಥಿಗಳು ಹಾಗೂ ಪರಿಶಿಷ್ಟ ಪಂಗಡದ 395 ವಿದ್ಯಾರ್ಥಿಗಳು, ಹಿಂದುಳಿದ ವರ್ಗಕ್ಕೆ ಸೇರಿದ 11,693 ವಿದ್ಯಾರ್ಥಿಗಳು ಪಾಸ್‌ ಆಗಿದ್ದಾರೆ. ಅದೇ ರೀತಿ 12ನೇ ತರಗತಿಯಲ್ಲಿ 79 ಪರಿಶಿಷ್ಟ ಜಾತಿ ಮತ್ತು 26 ಪರಿಶಿಷ್ಟ ಪಂಗಡ ಮತ್ತು ಹಿಂದುಳಿದ 326 ವಿದ್ಯಾರ್ಥಿಗಳು ಪಾಸ್‌ ಆಗಿದ್ದಾರೆ.