ಚಾಮರಾಜನಗರ: ಮಹಾಶಿವರಾತ್ರಿಯಂದು ಶಿವನ ಒಲುಮೆಗಾಗಿ ಭಕ್ತರು ವಿವಿಧ ಪೂಜೆ, ನಿಯಮ, ವ್ರತ ಅನುಸರಿಸುತ್ತಾರೆ. ಹಾಗೆಯೇ ತಾಲೂಕಿನ ಹೆಗ್ಗೊಠಾರ ಗ್ರಾಮದ ಆರು ಮನೆತನದವರು ಆಚರಿಸುವ ವ್ರತ ವಿಭಿನ್ನವಾದುದು. ಶಿವರಾತ್ರಿ ದಿನ ಗ್ರಾಮದ ಆರು ಮನೆಗಳ ತಲಾ ಒಬ್ಬೊಬ್ಬರು ಬೆಳಗ್ಗೆ ಬರಿಗಾಲಲ್ಲಿ ನಡೆದು 40 ಕಿಮೀ ದೂರದ ಕಪಿಲಾ ನದಿಯಿಂದ ತಾಮ್ರದ ಬಿಂದಿಗೆಯಲ್ಲಿ ನೀರು ಹೊತ್ತು ತಂದು ಗ್ರಾಮದ ಸಿದ್ದರಾಮೇಶ್ವರ ಸ್ವಾಮಿಗೆ ಅಭಿಷೇಕ ಮಾಡಲಾಗುತ್ತದೆ. ಇದು ಇಲ್ಲಿನ ವಿಶೇಷ.
ಗ್ರಾಮದ ಆರು ಮನೆಗಳ ಪುರುಷರು ಈ ಸೇವೆ ಸಲ್ಲಿಸುತ್ತಾರೆ. ಗ್ರಾಮದ ಹಿಂದಲಟ್ಟಿ ಗುರುಲಿಂಗಪ್ಪನ ಶಿವಮಲ್ಲಪ್ಪ, ಬುರುಗುಂಡಿ ಶಿವಮಾದಪ್ಪನ ರಾಜಪ್ಪ, ಕರೇಗಾರ್‌ ಸೋಮಪ್ಪನ ಬಸವಣ್ಣ, ಅಂಗರಕೆ ಬಸಪ್ಪನ ಕುಮಾರ್‌, ಬುರುಗುಂಡಿ ಸುಬ್ಬಪ್ಪನ ಸಿದ್ದಪ್ಪ, ಅಂಕಪ್ಪನ ಮಾದಪ್ಪ ಈ ಬಾರಿಯ ಕಪಿಲಾ ಜಲ ಕೈಂಕರ್ಯದಲ್ಲಿ ಪಾಲ್ಗೊಂಡಿದ್ದರು.
ಈ ಆರೂ ಮಂದಿ ಮಂಗಳವಾರ ಬೆಳಗ್ಗೆ ಆರು ಗಂಟೆಗೆ ಸ್ನಾನ ಮಡಿ ಮಾಡಿ ಬಸ್‌ನಲ್ಲಿ ನಂಜನಗೂಡು ಮೂಲಕ ನಗರ್ಲೆ ಗ್ರಾಮಕ್ಕೆ ತೆರಳಿದರು. ಅಲ್ಲಿರುವ ಕಪಿಲಾ ತಟಕ್ಕೆ ಹೋಗಿ ಮತ್ತೆ ಸ್ನಾನ ಮಾಡಿ, ತಾಮ್ರದ ಬಿಂದಿಗೆಗೆ ಪೂಜೆ ಮಾಡಿ, ಬಳಿಕ ನೀರು ತುಂಬಿಕೊಂಡು 10 ಕಿ.ಮೀ. ದೂರ ನಡೆದು ಆನಂಬಳ್ಳಿ ತಲುಪಿದರು.
ಅಲ್ಲಿ ಪದ್ಧತಿಯಂತೆ ಬಸವರಾಜಪ್ಪ ಅವರ ಮನೆಯಲ್ಲಿ ಬಿಂದಿಗೆ ಇಳಿಸಿ, ಉಪಾಹಾರ ಸೇವಿಸಿ ಬಳಿಕ, ಗೋನಳ್ಳಿ, ಅಳಗಂಚಿ ಮೂಲಕ ದೇವನೂರಿಗೆ ಬಂದು ಅಲ್ಲಿ, ಮಠದಲ್ಲಿ ಬಿಂದಿಗೆ ಇಳಿಸಿ, ಪ್ರಸಾದ ಸೇವಿಸಿ ಮತ್ತೆ ಬಿಂದಿಗೆ ಹೊತ್ತು, ಕೌಲಂದೆ, ಹೆಗ್ಗವಾಡಿ, ಬೆಂಡರವಾಡಿ ಮೂಲಕ ತಮ್ಮೂರಿಗೆ ತಲುಪಿದರು. ಹೆಗ್ಗೊಠಾರ ತಲುಪುವ ವೇಳೆಗೆ ಸಂಜೆ 6.30 ರಿಂದ 7 ಗಂಟೆಯಾಗಿತ್ತು.
ದೇವಸ್ಥಾನದಲ್ಲಿ ಕಪಿಲಾ ನದಿಯಿಂದ ನೀರು ತಂದಿದ್ದ ಬಿಂದಿಗೆ ಇಳಿಸಿದರು. ಇವರ ಜೊತೆಗೆ ಗ್ರಾಮದ ಬಾವಿಯಿಂದ ಜನರು 101 ಬಿಂದಿಗೆ ಹೊತ್ತು ಮೆರವಣಿಗೆ ಮೂಲಕ ದೇವಸ್ಥಾನಕ್ಕೆ ತೆರಳಿ, ಸಿದ್ದರಾಮೇಶ್ವರನ ಸನ್ನಿಧಿಯಲ್ಲಿ ಕಪಿಲಾ ಜಲಕ್ಕೆ ವಿಶೇಷ ಪೂಜೆ ಸಲ್ಲಿಸಿದರು. ನಂತರ ಕಪಿಲಾ ಜಲದೊಂದಿಗೆ ಬಿಲ್ವಪತ್ರೆಯನ್ನು ಹಾಕಿ ಸಿದ್ದರಾಮೇಶ್ವರನಿಗೆ ರಾತ್ರಿಯಿಡೀ 5 ಬಾರಿ ಅಭಿಷೇಕ, ಪೂಜೆ ಸಲ್ಲಿಸಲಾಯಿತು. ಇಡೀ ರಾತ್ರಿ ಗ್ರಾಮಸ್ಥರೆಲ್ಲ ಒಟ್ಟಾಗಿ ದೇವಸ್ಥಾನದಲ್ಲಿ ಜಾಗರಣೆ ಮಾಡಿದರು. ಹೆಗ್ಗೊಠಾರ ಗ್ರಾಮದಲ್ಲಿ ಸುಮಾರು 700 ವರ್ಷಗಳ ಹಿಂದೆ ಚೋಳರ ಕಾಲದಲ್ಲಿ ನಿರ್ಮಾಣ ಮಾಡಲಾಗಿರುವ ಸಿದ್ದರಾಮೇಶ್ವರ ದೇವಾಲ ಯದಲ್ಲಿ ಪ್ರತಿ ವರ್ಷ ಶಿವರಾತ್ರಿಯಂದು ಈ ವಿಶೇಷ ಪೂಜೆ ನಡೆಯುತ್ತದೆ. ಸ್ವಾಮಿಗೆ ಹೊಸ ನೀರು ತಂದು ಪೂಜೆ ಸಲ್ಲಿಸುವ ವಾಡಿಕೆ. ಈ ರೀತಿಯ ಆಚರಣೆ ಯಾಕೆ ಬಂತು ಎಂಬುದು ಗ್ರಾಮದ ಈ ಮನೆಗಳಿಗೂ ತಿಳಿದಿಲ್ಲ. ತಮ್ಮ ಮುತ್ತಾತರ ಕಾಲದಿಂದಲೂ ಪದ್ಧತಿ ನಡೆದುಬಂದಿದೆ. ಅದನ್ನು ಮುಂದುವರಿಸುತ್ತಿದ್ದೇವೆ ಎನ್ನುತ್ತಾರೆ, ನೀರು ತಂದ ಗುರುಲಿಂಗಪ್ಪನ ಶಿವಮಲ್ಲಪ್ಪ.
