ಕಲಬುರಗಿ-ತಿರುಪತಿ : ಇಂದಿನಿಂದ ನೇರ ವಿಮಾನ

ಕಲಬುರಗಿ: ಶರಣರ ನಾಡು ಕಲಬುರಗಿ ಮತ್ತು ತಿಮ್ಮಪ್ಪನ ಸನ್ನಿಧಾನ ತಿರುಪತಿ ಇನ್ನು ಹತ್ತಿರವಾಗಲಿದೆ. ಸ್ಟಾರ್‌ ಏರ್‌ ವಿಮಾನಯಾನ ಸಂಸ್ಥೆ ಜ.11ರಿಂದ ಕಲಬುರಗಿ ಹಾಗೂ ತಿರುಪತಿ ನಡುವೆ ವಿಮಾನ ಸೇವೆ ಆರಂಭಿಸಲಿದೆ. ವಾರದಲ್ಲಿ ನಾಲ್ಕು ದಿನ ವಿಮಾನ ಹಾರಾಟ ನಡೆಯಲಿದೆ.

ಉಡಾನ್‌ ಯೋಜನೆಯಡಿ ನೇರ ವಿಮಾನ ಹಾರಾಟ ನಡೆಸಲಿದ್ದು, ಬೆಳಗ್ಗೆ 9.55ಕ್ಕೆ ಕಲಬುರಗಿ ನಿಲ್ದಾಣದಿಂದ ಹೊರಡಲಿದ್ದು 11ಕ್ಕೆ ತಿರುಪತಿಗೆ ತಲುಪಲಿದೆ. ಅಪರಾಹ್ನ 2.25ಕ್ಕೆ ತಿರುಪತಿಯಿಂದ ಹೊರಟು 3.30ಕ್ಕೆ ಕಲಬುರಗಿಗೆ ಬಂದಿಳಿಯಲಿದೆ. ಸೋಮವಾರ, ಗುರುವಾರ, ಶುಕ್ರವಾರ, ರವಿವಾರ ಈ ವಿಮಾನ ಸಂಚರಿಸಲಿದೆ. ಘೋಡವತ್‌ ಸಮೂಹ ಸಂಸ್ಥೆ ಒಡೆತನದ ಸ್ಟಾರ್‌ ಏರ್‌ ವಿಮಾನಯಾನ ಸಂಸ್ಥೆ ಕಲಬುರಗಿಯನ್ನು ದೇಶದ ಪ್ರಮುಖ ನಗರಗಳೊಂದಿಗೆ ಸಂಪರ್ಕಿಸಲು ವಿಶ್ವದರ್ಜೆ ವಿಮಾನ ಸೇವೆ ಒದಗಿಸುತ್ತಿದೆ. ಈಗಾಗಲೇ ಕಲಬುರಗಿ ನಿಲ್ದಾಣದಿಂದ ಬೆಂಗಳೂರು, ದಿಲ್ಲಿಗೆ ನೇರ ವಿಮಾನ ಸೇವೆ ಕಲ್ಪಿಸಲಾಗಿದೆ.