ಕಲಬುರಗಿಯಲ್ಲಿ ಪೇದೆಗೆ ಕೋವಿಡ್ ದೃಢ: 64ಕ್ಕೆ ಸೋಂಕಿತರ ಸಂಖ್ಯೆ ಏರಿಕೆ

ಕಲಬುರಗಿ: ಜಿಲ್ಲೆಯಲ್ಲಿ ಮಹಾಮಾರಿ‌ ಕೋವಿಡ್-19 ಸೋಂಕು ಪೊಲೀಸ್ ಇಲಾಖೆಗೂ ವ್ಯಾಪಿಸಿದೆ. ಬುಧವಾರ ಕೆಎಸ್ಆರ್ ಪಿ ಪೇದೆಗೆ ಸೋಂಕು ದೃಢಪಟ್ಟಿದ್ದು, ಒಟ್ಟು ಸೋಂಕಿತರ ಸಂಖ್ಯೆ 64ಕ್ಕೆ ಏರಿಕೆಯಾಗಿದೆ.

ನಗರದ ಗಾಜಿಪುರದ 78 ವರ್ಷದ ವೃದ್ಧ (ಪಿ-610) ನಿಂದ ಕೆಎಸ್ಆರ್ ಪಿಯ 52 ವರ್ಷದ ಪೇದೆ (ಪಿ-679) ಗೆ ಕೋವಿಡ್ ಸೋಂಕು ಹರಡಿದೆ. ಈ ಉಸಿರಾಟ ಸಮಸ್ಯೆಯಿಂದ ಬಳಲುತ್ತಿದ್ದ ವೃದ್ಧನಿಗೆ ಏ.3ರಂದು ಸೋಂಕು ಖಚಿತವಾಗಿತ್ತು.

ಕೆಎಸ್ಆರ್ ಪಿ ಪೇದೆ ಮತ್ತು ವೃದ್ಧ ಒಂದೇ ಅಕ್ಕ-ಪಕ್ಕದ ಮನೆಯವರಾಗಿದ್ದು, ಇಬ್ಬರೂ ಬಾಡಿಗೆ ಇದ್ದಾರೆ. ಈ ವೃದ್ಧನಿಂದ ಪೇದೆಗೆ ಸೋಂಕು ಹರಡಿದ್ದು, ಈತ ಕೆಎಸ್ಆರ್ ಪಿ ಅಧಿಕಾರಿ ಮನೆಯಲ್ಲಿ ಆರ್ಡರ್ಲಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದ ಎಂದು ಗೊತ್ತಾಗಿದೆ.‌

ರಾಜ್ಯದ ಒಟ್ಟು ಸೋಂಕಿತರ ಸಂಖ್ಯೆ 690ಕ್ಕೆ ಏರಿಕೆಯಾಗಿದೆ. ಇವರಲ್ಲಿ 29 ಜನರು ಸಾವನ್ನಪ್ಪಿದರೆ, 345 ಜನರು ಗುಣಮುಖರಾಗಿದ್ದಾರೆ. ಮತ್ತು ಓರ್ವ ಕೋವಿಡ್ ಅಲ್ಲದ ಕಾರಣದಿಂದ ಸಾವನ್ನಪ್ಪಿದ್ದಾನೆ.