4ನೇ ಅಟ್ಲಾಂಟಾ ಪ್ರಶಸ್ತಿ ಗೆದ್ದ ಇಸ್ನರ್‌

ವಾಷಿಂಗ್ಟನ್‌: ಅಲ್‌ ಅಮೆರಿಕನ್‌ “ಅಟ್ಲಾಂಟಾ ಎಟಿಪಿ ಟೆನಿಸ್‌’ ಪಂದ್ಯಾವಳಿಯಲ್ಲಿ ಜಾನ್‌ ಇಸ್ನರ್‌ 4ನೇ ಬಾರಿಗೆ ಚಾಂಪಿಯನ್‌ ಆಗಿ ಮೂಡಿಬಂದಿದ್ದಾರೆ. ಫೈನಲ್‌ನಲ್ಲಿ ಅವರು ತೀವ್ರ ಪೈಪೋಟಿ ನೀಡಿದ ರಿಯಾನ್‌ ಹ್ಯಾರಿಸನ್‌ ಅವರನ್ನು 7-6 (8-6), 7-6 (9-7) ಅಂತರ ದಿಂದ ಮಣಿಸಿದರು.

ಅಮೆರಿಕದ ದ್ವಿತೀಯ ಶ್ರೇಯಾಂಕದ ಆಟಗಾರನಾಗಿರುವ ಜಾನ್‌ ಇಸ್ನರ್‌ ಇಲ್ಲಿ ಆಡಿದ 8 ಪಂದ್ಯಾವಳಿಗಳಲ್ಲಿ 7 ಸಲ ಫೈನಲ್‌ಗೆ ಲಗ್ಗೆ ಇರಿಸಿದ್ದರು. ಇದು ಅಟ್ಲಾಂಟಾದಲ್ಲಿ ಇಸ್ನರ್‌ ಗೆದ್ದ 4ನೇ ಪ್ರಶಸ್ತಿ. ಇದಕ್ಕೂ ಮುನ್ನ 2013ರಿಂದ ಮೊದಲ್ಗೊಂಡು ಹ್ಯಾಟ್ರಿಕ್‌ ಸಾಧನೆ ಮಾಡಿದ್ದರು. ಇದು 2 ವಾರಗಳ ಅಂತರದಲ್ಲಿ ಜಾನ್‌ ಇಸ್ನರ್‌ ಗೆದ್ದ 2ನೇ ಟೆನಿಸ್‌ ಪ್ರಶಸ್ತಿ. ಕಳೆದ ವಾರ ಅವರು ನ್ಯೂಪೋರ್ಟ್‌ ನಲ್ಲೂ ಚಾಂಪಿಯನ್‌ ಆಗಿ ಹೊರಹೊಮ್ಮಿದ್ದರು. 

4ನೇ ಶ್ರೇಯಾಂಕದ ರಿಯಾನ್‌ ಹ್ಯಾರಿಸನ್‌ಗೆ ಈ ಸೋಲಿನಿಂದ ಟೆನಿಸ್‌ ಬಾಳ್ವೆಯ 2ನೇ ಪ್ರಶಸ್ತಿ ಸ್ವಲ್ಪದರಲ್ಲೇ ಕೈತಪ್ಪಿತು. ಕಳೆದ ಫೆಬ್ರವರಿಯಲ್ಲಿ ಹ್ಯಾರಿಸನ್‌ “ಮೆಂಫಿಸ್‌ ಟೆನಿಸ್‌’ ಪ್ರಶಸ್ತಿ ಪಡೆದಿದ್ದರು.

ಈ ಜಯದೊಂದಿಗೆ ಜಾನ್‌ ಇಸ್ನರ್‌ ಅಮೆರಿಕದ ಅಗ್ರ ರ್‍ಯಾಂಕಿಂಗ್‌ ಆಟಗಾರನೆನಿಸಿಕೊಂಡರು. ಜಾಕ್‌ ಸೋಕ್‌ ಅವರನ್ನು ಕೆಳಕ್ಕೆ ತಳ್ಳಿದರು.