Johannesburg: ಐದು ಅಂತಸ್ತಿನ ಬಹುಮಹಡಿ ಕಟ್ಟಡದಲ್ಲಿ ಬೆಂಕಿ: 73 ಸಾವು

ಜೊಹಾನ್ಸ್‌ಬರ್ಗ್‌: ಐದು ಅಂತಸ್ತಿನ ಬಹುಮಹಡಿ ಕಟ್ಟಡದಲ್ಲಿ ಸಂಭವಿಸಿದ ಭೀಕರ ಅಗ್ನಿ ಅವಘಡದಲ್ಲಿ 73 ಮಂದಿ ಮೃತಪಟ್ಟಿರುವ ಘಟನೆ ದಕ್ಷಿಣ ಆಫ್ರಿಕಾದ ಜೊಹಾನ್ಸ್‌ಬರ್ಗ್‌ನಲ್ಲಿ ಗುರುವಾರ ನಡೆದಿದೆ. ಘಟನೆಯಲ್ಲಿ ಇತರೆ 52 ಮಂದಿ ಗಾಯಗೊಂಡಿದ್ದಾರೆ.

“ಗಾಯಗೊಂಡವರನ್ನು ಸ್ಥಳೀಯ ಆಸ್ಪತ್ರೆಗಳಿಗೆ ಸೇರಿಸಲಾಗಿದೆ. ಕೆಲವರು ಬೆಂಕಿಯಿಂದ ಉಂಟಾದ ಹೊಗೆ ಸೇವಿಸಿದ್ದು, ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಮೃತ 73 ಮಂದಿ ಪೈಕಿ ಏಳು ಮಂದಿ ಮಕ್ಕಳು’ ಎಂದು ಜೋಹಾನ್ಸ್‌ಬರ್ಗ್‌ ತುರ್ತು ನಿರ್ವಹಣೆ ಸೇವೆಗಳ ವಕ್ತಾರ ರಾಬರ್ಟ್‌ ಮುಲಾಡಿ ಮಾಹಿತಿ ನೀಡಿದ್ದಾರೆ. “ನಿರಂತರ ಪಯತ್ನದಿಂದಾಗಿ ಅಗ್ನಿಶಾಮಕ ಸಿಬ್ಬಂದಿ ಬೆಂಕಿಯನ್ನು ನಂದಿಸಿದ್ದಾರೆ. ಶೋಧ ಕಾರ್ಯ ಮುಂದುವರಿದಿದೆ. ಮೃತದೇಹಗಳನ್ನು ಕಟ್ಟಡದಿಂದ ಹೊರಕ್ಕೆ ತರುವ ಕಾರ್ಯ ಪ್ರಗತಿಯಲ್ಲಿದೆ. ಕೆಲವರ ದೇಹಗಳು ಸಂಪೂರ್ಣವಾಗಿ ಸುಟ್ಟು ಕರಗಲಾಗಿದ್ದು, ಅವುಗಳನ್ನು ಗುರುತಿಸದಂತಾಗಿದೆ’ ಎಂದು ತಿಳಿಸಿದ್ದಾರೆ.