ಜಿತು-ಹೀನಾ: ಬಂಗಾರಕ್ಕೆ ಗುರಿ

ಹೊಸದಿಲ್ಲಿ: ಐಎಸ್‌ಎಸ್‌ಎಫ್ ವರ್ಲ್ಡ್ ಕಪ್‌ ಫೈನಲ್‌ ಶೂಟಿಂಗ್‌ ಸ್ಪರ್ಧೆಯಲ್ಲಿ ಜಿತು ರಾಯ್‌-ಹೀನಾ ಸಿಧು ಜೋಡಿ ಭಾರತಕ್ಕೆ ಮೊದಲ ಚಿನ್ನದ ಪದಕವನ್ನು ತಂದಿತ್ತಿದೆ. ಮಂಗಳವಾರ ಇಲ್ಲಿನ “ಡಾ| ಕರ್ಣಿ ಸಿಂಗ್‌ ಶೂಟಿಂಗ್‌ ರೇಂಜಸ್‌’ನಲ್ಲಿ ನಡೆದ 10 ಮೀ. ಏರ್‌ ಪಿಸ್ತೂಲ್‌ ಮಿಕ್ಸೆಡ್‌ ತಂಡ ಸ್ಪರ್ಧೆಯಲ್ಲಿ ಇವರಿಬ್ಬರು ಬಂಗಾರಕ್ಕೆ ಗುರಿ ಇರಿಸಿದರು. 

ಜಿತು ರಾಯ್‌-ಹೀನಾ ಸಿಧು ಫೈನಲ್‌ನಲ್ಲಿ 483.4 ಅಂಕ ಸಂಪಾದಿಸಿ ಸ್ವರ್ಣ ಸಾಧನೆಗೈದರು. ಇದು ಈ ಜೋಡಿಗೆ ಒಟ್ಟಾರೆಯಾಗಿ ಒಲಿದ 3ನೇ ಶೂಟಿಂಗ್‌ ಚಿನ್ನವಾದರೆ, ಐಎಸ್‌ಎಸ್‌ಎಫ್ ವರ್ಲ್ಡ್ ಕಪ್‌ ಫೈನಲ್‌ನಲ್ಲಿ ಮೊದಲನೆಯದು. ಫ್ರಾನ್ಸ್‌ನ ಗೊಬರ್ವಿಲ್ಲೆ-ಫಾಕ್ವೆಟ್‌ ಬೆಳ್ಳಿ ಪದಕ ಗೆದ್ದರೆ (481.1), ಚೀನದ ಕೈ-ಯಾಂಗ್‌ ಕಂಚು ಪಡೆದರು (418.2). 
ಮೊದಲ ಸಲ ಐಎಸ್‌ಎಸ್‌ಎಫ್ ವರ್ಲ್ಡ್ ಕಪ್‌ ಆತಿಥ್ಯ ವಹಿಸಿರುವ ಭಾರತ, ಜಿತು-ಹೀನಾ ಸಾಧನೆಯಿಂದ ಸಹಜವಾಗಿಯೇ ಹಿಗ್ಗಿದೆ. ಜಿತು ರಾಯ್‌ ಕಾಮನ್ವೆಲ್ತ್‌ ಮತ್ತು ಏಶ್ಯನ್‌ ಗೇಮ್ಸ್‌ ಬಂಗಾರ ಪದಕ ವಿಜೇತರಾಗಿದ್ದಾರೆ. ಹೀನಾ ಸಿಧು ಕೂಡ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಚಿನ್ನ ಗೆದ್ದ ಹಿರಿಮೆ ಹೊಂದಿದ್ದಾರೆ. 

ಈ ವರ್ಷಾರಂಭದ “ಶೂಟಿಂಗ್‌ ವರ್ಲ್ಡ್ ಕಪ್‌’ ನಲ್ಲಿ ಮೊದಲ ಸಲ ಪ್ರಾಯೋಗಿಕವಾಗಿ ಮಿಕ್ಸೆಡ್‌ ಸ್ಪರ್ಧೆ ಯನ್ನು ಅಳವಡಿಸಲಾಗಿತ್ತು. ಇದಕ್ಕೀಗ ಒಲಿಂಪಿಕ್ಸ್‌ ಬಾಗಿಲು ತೆರೆಯಲಿದ್ದು, 2020ರ ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಮಿಕ್ಸೆಡ್‌ ಶೂಟಿಂಗ್‌ ಸ್ಪರ್ಧೆಯನ್ನು ಮೊದಲ ಸಲ ಅಳವಡಿಸಲಾಗುವುದು.