ಜಿದ್ದಾಜಿದ್ದಿನ ಹೋರಾಟದಲ್ಲಿ ಗೆಲುವು ಸಾಧಿಸಲು ಯಶಸ್ವಿಯಾದ ಜಿಗ್ನೇಶ್ ಮೇವಾನಿ

ಗಾಂಧಿನಗರ : ಗುಜರಾತ್ ನಲ್ಲಿ ಬಿಜೆಪಿ ಭಾರಿ ಅಲೆಯ ನಡುವೆಯೂ ವಡಗಾಮ್ ಎಸ್ ಸಿ ಮೀಸಲು ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಜಿಗ್ನೇಶ್ ಮೇವಾನಿ ಗೆಲುವು ಸಾಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಮೇವಾನಿ 82170 ಮತಗಳನ್ನು ಗಳಿಸಿದ್ದು, ಬಿಜೆಪಿ ಅಭ್ಯರ್ಥಿ ಮಣಿಭಾಯ್ ಜೇತಭಾಯಿ ವಘೇಲಾ 78240 ಮತಗಳು ಆಪ್ ನ ದಲಪತಭಾಯಿ ದಹ್ಯಾಭಾಯಿ ಭಾಟಿಯಾ 4096 ಮತಗಳು , ಓವೈಸಿ ಅವರ ಎಐಎಐಎಮ್ ನ ಸುಂಧಿಯಾ ಕಲ್ಪೇಶಕುಮಾರ್ 1871 ಮತಗಳನ್ನು ಪಡೆದಿದ್ದಾರೆ.

ಬನಸ್ಕಾಂತ ಜಿಲ್ಲೆಯ ವಡಗಾಮ್ ಕ್ಷೇತ್ರದಲ್ಲಿ 40,000 ಕ್ಕೂ ಹೆಚ್ಚು ಎಸ್‌ಸಿ ಮತದಾರರಿದ್ದು, ಸುಮಾರು 10,000 ಎಸ್‌ಟಿ ಮತದಾರರು ನಿರ್ಣಾಯಕರಾಗಿದ್ದರು.ಅಂದಾಜಿನ ಪ್ರಕಾರ, 2,70,000 ಮತದಾರರನ್ನು ಹೊಂದಿದೆ.  64 % ಮತದಾನ ನಡೆದಿತ್ತು.

ಗುಜರಾತ್  2017ರ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಮತ್ತು ಆಮ್ ಆದ್ಮಿ ಪಕ್ಷಗಳು ತಮ್ಮ ಅಭ್ಯರ್ಥಿಗಳನ್ನು ಹಿಂತೆಗೆದುಕೊಂಡು ಮೇವಾನಿಗೆ ತಮ್ಮ ಬೆಂಬಲವನ್ನು ಘೋಷಿಸಿದ್ದವು. ಅವರು ಗೆಲುವು ಸಾಧಿಸಿ ರಾಷ್ಟ್ರ ಮಟ್ಟದಲ್ಲಿ ಸುದ್ದಿಯಾಗಿದ್ದರು. ವಡ್ಗಾಮ್ ಕ್ಷೇತ್ರದಿಂದ ಪಕ್ಷೇತರರಾಗಿ ಗೆದ್ದಿದ್ದ ಮೇವಾನಿ,ವಕೀಲರಾಗಿ, ಪತ್ರಕರ್ತರಾಗಿ, ಸಾಮಾಜಿಕ ಕಾರ್ಯಕರ್ತರಾಗಿ  ರಾಷ್ಟ್ರೀಯ ದಲಿತ ಅಧಿಕಾರ್ ಮಂಚ್ ( ರಾಜ್ಯ ದಲಿತ ಹಕ್ಕುಗಳ ವೇದಿಕೆ) ಸಂಚಾಲಕರಾಗಿದ್ದಾರೆ.