ಶಾರುಖ್ ಖಾನ್ ಅಭಿನಯದ ಹೊಸ ಸಿನಿಮಾ “ಜವಾನ್‌’ ತೆರೆಗೆ ಬರಲು ರೆಡಿಯಾಗುತ್ತಿದೆ. ಈಗಾಗಲೇ ನಿಧಾನವಾಗಿ “ಜವಾನ್‌’ ಸಿನಿಮಾದ ಪ್ರಚಾರ ಕಾರ್ಯಗಳನ್ನು ಆರಂಭಿಸಿರುವ ಚಿತ್ರತಂಡ, ಇದೀಗ ಸಿನಿಮಾದಲ್ಲಿ ಖಳನಾಯಕನಾಗಿ ಕಾಣಿಸಿಕೊಂಡಿರುವ ತಮಿಳು ನಟ ವಿಜಯ್‌ ಸೇತುಪತಿ ಅವರ ಫ‌ಸ್ಟ್‌ಲುಕ್‌ ಟೀಸರ್‌ ಅನ್ನು ಬಿಡುಗಡೆ ಮಾಡಿದೆ.
ಇನ್ನು “ಜವಾನ್‌’ ಸಿನಿಮಾದಲ್ಲಿ ವಿಲನ್‌ ಆಗಿರುವ ನಟ ವಿಜಯ್‌ ಸೇತುಪತಿ ಅವರ ಫ‌ಸ್ಟ್‌ಲುಕ್‌ ಟೀಸರ್‌ ಅನ್ನು ಸ್ವತಃ ತಮ್ಮ ಸೋಶಿಯಲ್‌ ಮೀಡಿಯಾ ಖಾತೆಯಲ್ಲಿ ಶೇರ್‌ ಮಾಡಿರುವ ಶಾರುಖ್ ಖಾನ್, ಸಿನಿಮಾದಲ್ಲಿ ವಿಜಯ್‌ ಸೇತುಪತಿ ಪಾತ್ರವನ್ನು “ಸಾವಿನ ವ್ಯಾಪಾರಿ’ ಎಂದು ಕರೆದುಕೊಂಡಿದ್ದಾರೆ.
ಇದೇ ಮೊದಲ ಬಾರಿಗೆ ಶಾರುಖ್ ಖಾನ್ ತಮಿಳು ನಟ ವಿಜಯ್‌ ಸೇತುಪತಿ ಅವರ ತೆರೆಹಂಚಿಕೊಳ್ಳುತ್ತಿದ್ದು, ಇತ್ತೀಚೆಗೆ ಬಿಡುಗಡೆಯಾದ “ಜವಾನ್‌’ ಸಿನಿಮಾದ ಪ್ರಿ-ವ್ಯೂನಲ್ಲಿ ವಿಜಯ್‌ ಸೇತುಪತಿ ಪಾತ್ರದ ಸಣ್ಣ ಝಲಕ್‌ ತೋರಿಸಲಾಗಿತ್ತು.
ಈಗಾಗಲೇ “ಜವಾನ್‌’ ಸಿನಿಮಾದಲ್ಲಿ ಶಾರುಖ್ ಖಾನ್ ಬಾಲ್ಡ… ಲುಕ್‌, ನಯನತಾರಾ ಆ್ಯಕ್ಷನ್‌ ಲುಕ್‌ ಎಲ್ಲವನ್ನು ಪರಿಚಯಿಸಿರುವ ಚಿತ್ರತಂಡ, ಇದೀಗ ವಿಜಯ್‌ ಸೇತುಪತಿ ಪಾತ್ರದ ಫ‌ಸ್ಟ್‌ಲುಕ್‌ ಟೀಸರ್‌ ಬಿಡುಗಡೆ ಮಾಡಿದೆ.
ಶಾರುಖ್ ಖಾನ್ ಒಡೆತನದ “ರೆಡ್‌ ಚಿಲ್ಲೀಸ್‌ ಎಂಟರ್‌ ಟೈನ್ಮೆಂಟ್‌’ ಬ್ಯಾನರಿನಲ್ಲಿ ಗೌರಿ ಖಾನ್ ನಿರ್ಮಿಸುತ್ತಿರುವ “ಜವಾನ್‌’ ಸಿನಿಮಾ ಇದೇ ಸೆಪ್ಟೆಂಬರ್‌ 7ರಂದು ಜಗತ್ತಿನಾದ್ಯಂತ ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಏಕಕಾಲಕ್ಕೆ ಬಿಡುಗಡೆಯಾಗುತ್ತಿದೆ.
