Japan Open: ಸೆಮಿಫೈನಲ್‌ನಲ್ಲಿ ಎಡವಿದ ಲಕ್ಷ್ಯ ಸೇನ್‌

ಟೋಕಿಯೊ: ಲಕ್ಷ್ಯ ಸೇನ್‌ ಸೋಲಿನೊಂದಿಗೆ “ಜಪಾನ್‌ ಓಪನ್‌ ಸೂಪರ್‌-750 ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯಲ್ಲಿ ಭಾರತದ ಹೋರಾಟ ಕೊನೆಗೊಂಡಿದೆ.

ಶನಿವಾರ ನಡೆದ ಸೆಮಿಫೈನಲ್‌ನಲ್ಲಿ ವಿಶ್ವದ ನಂ. 9 ಆಟಗಾರ, ಏಷ್ಯಾಡ್‌ ಚಾಂಪಿಯನ್‌ ಜೊನಾಥನ್‌ ಕ್ರಿಸ್ಟಿ 21-15, 13-21, 21-16 ಅಂತರದಿಂದ ಸೇನ್‌ಗೆ ಸೋಲುಣಿಸಿದರು.

ಇಬ್ಬರೂ 1-1 ಸಮಬಲ ದಾಖಲೆಯೊಂದಿಗೆ ಹೋರಾಟ ಆರಂಭಿಸಿದ್ದರು. 21 ವರ್ಷದ ಸೇನ್‌ ಮೊದಲ ಗೇಮ್‌ ಕಳೆದುಕೊಂಡ ಬಳಿಕ ಭರ್ಜರಿ ತಿರುಗೇಟು ನೀಡಿದರು. ಆದರೆ ನಿರ್ಣಾಯಕ ಗೇಮ್‌ನಲ್ಲಿ ಮತ್ತೆ ಇಂಡೋನೇಷ್ಯಾ ಆಟಗಾರನ ಕೈ ಮೇಲಾಯಿತು.

ಸೇನ್‌ ಅವರ ವೇಗ, ಕ್ರಿಸ್ಟಿ ಅವರ ಮೇಲ್ಮಟ್ಟದ ಶಾಟ್ಸ್‌ ಈ ಪಂದ್ಯದ ಆಕರ್ಷಣೆ ಆಗಿತ್ತು. 68 ನಿಮಿಷಗಳ ತನಕ ಇವರ ಹೋರಾಟ ಸಾಗಿತು.

ಪಿ.ವಿ. ಸಿಂಧು, ಕೆ. ಶ್ರೀಕಾಂತ್‌, ಎಚ್‌.ಎಸ್‌. ಪ್ರಣಯ್‌ ಅವರೆಲ್ಲ ಬಹಳ ಬೇಗನೇ ಈ ಕೂಟದಿಂದ ನಿರ್ಗಮಿಸಿದ್ದರು.