ಕೋಲ್ಕತಾ: ಪೋಸ್ಟ್‌ ಕಾರ್ಡ್‌ಗಳನ್ನು ಬರೆಯುವವರ ಸಂಖ್ಯೆ ದೇಶದ ಇತರ ಭಾಗಗಳಲ್ಲಿ ದಿನದಿಂದ ದಿನಕ್ಕೆ ಕಡಿಮೆಯಾಗುತ್ತಿದೆ. ಆದರೆ ಪಶ್ಚಿಮ ಬಂಗಾಳದಲ್ಲಿ ಪೋಸ್ಟ್‌ ಕಾರ್ಡ್‌ಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆದರೆ ಇಡೀ ಪೋಸ್ಟ್‌ಕಾರ್ಡ್‌ನಲ್ಲಿ ಇರುವ ಸಂಗತಿ ಕೇವಲ ಜೈ ಶ್ರೀರಾಮ್‌!
ಜೈ ಶ್ರೀರಾಮ್‌ ಎಂದು ಕೂಗಿದವರನ್ನು ಕಂಡರೆ ಕೆಂಡಾಮಂಡಲವಾಗುತ್ತಿದ್ದ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿಗೆ ಜೈಶ್ರೀರಾಮ್‌ ಎಂದು ಬರೆದ ಪೋಸ್ಟ್‌ಕಾರ್ಡ್‌ ಗಳನ್ನು ಕಳುಹಿಸುವುದಾಗಿ ಹಿಂದೂ ಪರ ಸಂಘಟನೆಗಳು ನಿರ್ಧರಿಸಿದಂದಿನಿಂದ ಪ್ರತಿ ದಿನ 8 ಸಾವಿರಕ್ಕೂ ಹೆಚ್ಚು ಕಾರ್ಡ್‌ಗಳು ಮಮತಾ ನಿವಾಸದ ವ್ಯಾಪ್ತಿಗೆ ಒಳಪಡುವ ಕಾಲೀಘಾಟ್ ಪೋಸ್ಟ್‌ ಆಫೀಸ್‌ಗೆ ಬರುತ್ತಿವೆ.
Advertisement
ಅಲ್ಲಿಯವರೆಗೆ 20-30 ಪೋಸ್ಟ್‌ಕಾರ್ಡ್‌ಗಳು ಬರುತ್ತಿದ್ದರೆ, ಒಂದೇ ಸಮನೆ ಇದರ ಸಂಖ್ಯೆ ಹೆಚ್ಚಿದೆ. ಮಮತಾ ಮನೆಗೆ ನಿತ್ಯ ಅಂಚೆ ತಲುಪಿಸಲು ಒಬ್ಬ ಪೋಸ್ಟ್‌ಮ್ಯಾನ್‌ ನಿಯೋಜಿಸಲಾಗಿದ್ದು, ಈತ ಎಲ್ಲ ಪೋಸ್ಟ್‌ಗಳನ್ನೂ ನಿಗದಿತ ವ್ಯಕ್ತಿಗೆ ಹಸ್ತಾಂತರಿಸುತ್ತಾನೆ. ಆದರೆ ಈ ಪ್ರಮಾಣದ ಜೈಶ್ರೀರಾಮ್‌ ಪೋಸ್ಟ್‌ಕಾರ್ಡ್‌ಗಳಿಂದ ಆತ ಈಗ ಚಿಂತಾಕ್ರಾಂತನಾಗಿದ್ದಾನೆ.