Jai Hanuman: ರಿಷಬ್‌ ಗೆ ಜೈ ಎಂದ ಹನುಮಾನ್‌ ನಿರ್ದೇಶಕ

ನಟ ರಿಷಬ್‌ ಶೆಟ್ಟಿ (Rishab Shetty) ಅವರ “ಕಾಂತಾರ 2′ ಹುಟ್ಟಿಸಿದ ನಿರೀಕ್ಷೆಯಷ್ಟೇ ಅವರ ಹೊಸ ಸಿನಿಮಾ “ಜೈ ಹನುಮಾನ್‌’ (Jai Hanuman) ಕೂಡ ನಿರೀಕ್ಷೆ ಹುಟ್ಟಿಸಿದೆ. ಇತ್ತೀಚೆಗೆ ಚಿತ್ರದಲ್ಲಿನ ಅವರ ಫ‌ಸ್ಟ್‌ ಪೋಸ್ಟರ್‌ ಬಿಡುಗಡೆಗೊಂಡಿತ್ತು. ರಾಮನ ಮೂರ್ತಿ ಹಿಡಿದ ಹನುಮನ ಪಾತ್ರದಲ್ಲಿ ರಿಷಬ್‌ ಮಿಂಚಿದ್ದರು. ಸದ್ಯ ಪೋಸ್ಟರ್‌ ಎಲ್ಲೆಡೆ ವೈರಲ್‌ ಆಗುತ್ತಿದೆ.

ಈ ಬಗ್ಗೆ “ಜೈ ಹನುಮಾನ್‌’ ನಿರ್ದೇಶಕ ಪ್ರಶಾಂತ್‌ ವರ್ಮಾ, ಚಿತ್ರೀಕರಣದ ಫೋಟೋ ಜೊತೆ ಸಂತಸದ ಮಾತುಗಳನ್ನು ಹಂಚಿಕೊಂಡಿದ್ದಾರೆ. “ರಾಷ್ಟ್ರಪ್ರಶಸ್ತಿ ವಿಜೇತ ನಟ ರಿಷಬ್‌ ಶೆಟ್ಟಿ ಅವರಿಗೆ ಹೃದಯಪೂರ್ವಕ ಧನ್ಯವಾದಗಳು. ಹನುಮನ ಕುರಿತ ಅವರ ಭಕ್ತಿ ಹಾಗೂ ಅಪರಿಮಿತ ಪರಿಶ್ರಮದಿಂದ ಈ ಧ್ಯೇಯಕ್ಕೆ ಜೀವ ಬಂದಂತಾಗಿದೆ. ಪಾತ್ರಕ್ಕಾಗಿ ಅವರ ಅದ್ಭುತ ರೂಪಾಂತರ, ನಿಖರತೆ ಹಾಗೂ ಸ್ಥಿರ ಬದ್ಧತೆಗಳಿಂದ “ಜೈ ಹನುಮಾನ್‌’ ಚಿತ್ರ ಅತ್ಯದ್ಭುತವನ್ನಾಗಿಸಿದೆ. ಕರ್ನಾಟಕದ ಒಂದು ಊರಿನಿಂದ ವಿಶ್ವದೆಲ್ಲೆಡೆ ಖ್ಯಾತರಾಗಿರುವ ನೀವು, ತಮ್ಮ ಅಭಿಮಾನಿಗಳಿಗೋಸ್ಕರ ಮರೆಯಲಾಗದ ಅನುಭವ ನೀಡಲು ಸಜ್ಜಾಗುತ್ತಿದ್ದೀರಿ. ನಿಮ್ಮೊಂದಿಗೆ “ಜೈ ಹನುಮಾನ್‌’ ಪಯಣ ಆರಂಭಿಸಲು ಉತ್ಸುಕನಾಗಿದ್ದೇನೆ’ ಎಂದು ಸೋಶಿಯಲ್‌ ಮಿಡಿಯಾದಲ್ಲಿ ಬರೆದುಕೊಂಡಿದ್ದಾರೆ.

ಇದಕ್ಕೆ ನಟ ರಿಷಬ್‌, ಪ್ರಶಾಂತ್‌ ಕುರಿತಾಗಿ, “ನಿಮ್ಮ ಧ್ಯೇಯ ಹಾಗೂ ಸೃಜನಶೀಲನೆ ಅದ್ಭುತವಾಗಿದೆ! ಚಿತ್ರದ ತೆರೆಯ ಹಿಂದಿನ ಕ್ಷಣಗಳು ಸ್ಮರಣೀಯ. ನಿಮ್ಮ ನಿರ್ದೇಶನದಿಂದ ತೆರೆಯ ಮೇಲೆ ಜಾದೂ ಮೂಡಲಿದೆ’ ಎಂದು ಬರೆದುಕೊಂಡಿದ್ದಾರೆ.