ಇಸ್ರೋ ಹೊಸ ಮೈಲುಗಲ್ಲು; ವಾಣಿಜ್ಯ ಉಪಗ್ರಹ ಮಾರುಕಟ್ಟೆಗೆ ಪ್ರವೇಶ

ನವದೆಹಲಿ/ಶ್ರೀಹರಿಕೋಟ: ವಾಣಿಜ್ಯ ಉಪಗ್ರಹ ಮಾರುಕಟ್ಟೆಗೆ ಭಾರತೀಯ ಬಾಹ್ಯಾಕಾಶ ಮತ್ತು ಸಂಶೋಧನಾ ಸಂಸ್ಥೆ ಪ್ರವೇಶ ಪಡೆದಿದೆ.

ಯುಕೆ ಮೂಲದ ಒನ್‌ವೆಬ್‌ ಸಂಸ್ಥೆಯ 36 ಬ್ರಾಡ್‌ಬ್ಯಾಂಡ್‌ ಸಂವಹನ ಉಪಗ್ರಹಗಳನ್ನು ಹೊತ್ತು ಇಸ್ರೋದ ಅತ್ಯಂತ ಭಾರವಾದ ರಾಕೆಟ್‌ ಎಲ್‌ವಿಎಂ3-ಎಂ2 ಯಶಸ್ವಿಯಾಗಿ ನಭಕ್ಕೆ ಚಿಮ್ಮಿದೆ. ಶನಿವಾರ ತಡರಾತ್ರಿ 12.07 ನಿಮಿಷಕ್ಕೆ ರಾಕೆಟ್‌ ಉಡಾವಣೆಯಾಗಿದ್ದು, ಈ ಮೂಲಕ ಇಸ್ರೋ ಹೊಸ ಇತಿಹಾಸ ಬರೆದಿದೆ.

ಚೊಚ್ಚಲ ವಾಣಿಜ್ಯ ಉಡಾವಣೆಯ ಜೊತೆಗೆ ಬರೋಬ್ಬರಿ 5,796 ಕೆಜಿ ತೂಕದ ಪೇಲೋಡ್‌ ಹೊತ್ತು ನಭಕ್ಕೆ ಚಿಮ್ಮಿದ ಭಾರತದ ಮೊದಲ ರಾಕೆಟ್‌ ಎಂಬ ಹೆಗ್ಗಳಿಕೆಯೂ ಎಲ್‌ವಿಎಂ3-ಎಂ2ಗೆ ಪ್ರಾಪ್ತಿಯಾಯಿತು.

ಎಲ್ಲ ಉಪಗ್ರಹಗಳನ್ನೂ ಬಾಹ್ಯಾಕಾಶ ನೌಕೆಯು ಭೂಮಿಯ ಕೆಳಕಕ್ಷೆಗೆ ಯಶಸ್ವಿಯಾಗಿ ಸೇರಿಸುತ್ತಿದ್ದಂತೆ, “ನಮಗೆ ದೀಪಾವಳಿ ಇಂದೇ ಆರಂಭವಾಯಿತು ಎಂದು ಇಸ್ರೋ ಮುಖ್ಯಸ್ಥ ಡಾ.ಎಸ್‌. ಸೋಮನಾಥ್‌ ಉದ್ಗರಿಸಿದ್ದಾರೆ. ಜತೆಗೆ, ಇದೊಂದು ಐತಿಹಾಸಿಕ ಯೋಜನೆಯಾಗಿದ್ದು, ಪ್ರಧಾನಿ ಮೋದಿ ಅವರ ಬೆಂಬಲದಿಂದಾಗಿ ಈ ಯೋಜನೆ ಯಶಸ್ವಿಯಾಯಿತು ಎಂದೂ ಹೇಳಿದ್ದಾರೆ.

ಅಭಿನಂದನೆಗಳ ಮಹಾಪೂರ:
ಮಹತ್ವದ ಮೈಲುಗಲ್ಲು ಸಾಧಿಸಿರುವ ಇಸ್ರೋ ವಿಜ್ಞಾನಿಗಳಿಗೆ ರಾಷ್ಟ್ರಪತಿ ಮುರ್ಮು, ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಹಲವು ನಾಯಕರು ಅಭಿನಂದನೆ ಸಲ್ಲಿಸಿದ್ದಾರೆ. ದೇಶೀಯ ಸಾಮರ್ಥ್ಯಗಳನ್ನು ಪ್ರದರ್ಶಿಸುವಲ್ಲಿ ಯಶಸ್ವಿಯಾದ ನಮ್ಮ ವಿಜ್ಞಾನಿಗಳ ಬಗ್ಗೆ ಇಡೀ ದೇಶವೇ ಹೆಮ್ಮೆ ಪಡುತ್ತಿದೆ ಎಂದು ಮುರ್ಮು ಟ್ವೀಟ್‌ ಮಾಡಿದ್ದಾರೆ.

ಭೂಸ್ವಾಧೀನ ಪೂರ್ಣ
ತಮಿಳುನಾಡಿನಲ್ಲಿ ಸ್ಥಾಪಿಸಲು ಉದ್ದೇಶಿಸಿರುವ ರಾಕೆಟ್‌ ಉಡಾವಣಾ ವಲಯಕ್ಕಾಗಿ ಭೂಸ್ವಾಧೀನ ಕಾರ್ಯ ಪೂರ್ಣಗೊಂಡಿದೆ ಎಂದು ಇಸ್ರೋ ಮುಖ್ಯಸ್ಥರು ಭಾನುವಾರ ತಿಳಿಸಿದ್ದಾರೆ. ಶ್ರೀಹರಿಕೋಟದಿಂದ ಸುಮಾರು 650 ಕಿ.ಮೀ. ದೂರದಲ್ಲಿರುವ ತೂತುಕುಡಿ ಜಿಲ್ಲೆಯ ಕುಲಶೇಖರಪಟ್ಟಣಂನಲ್ಲಿ ಉಡಾವಣಾ ವಲಯ ರೂಪಿಸುವುದಾಗಿ ಅವರು ಮಾಹಿತಿ ನೀಡಿದ್ದಾರೆ. ಇದೇ ವೇಳೆ, 2023ರೊಳಗಾಗಿ ಭಾರತದಾದ್ಯಂತ ಕನೆಕ್ಟಿವಿಟಿ ಕಲ್ಪಿಸುವಲ್ಲಿ ನಾವು ಬದ್ಧರಾಗಿದ್ದೇವೆ ಎಂದು ಲಂಡನ್‌ ಮೂಲಕ ಉಪಗ್ರಹ ಸಂವಹನ ಕಂಪನಿ ಒನ್‌ವೆಬ್‌ ಹೇಳಿದೆ.