ಇಸ್ರೇಲ್‌ಗೆ Syria ಕಡೆಯಿಂದ ರಾಕೆಟ್‌ ದಾಳಿ; ಇದೇ ಮೊದಲ ಬಾರಿಗೆ ಇಂಥ ಬೆಳವಣಿಗೆ

ಜೆರೂಸಲೇಂ:ಸೇನೆಯನ್ನು ಗುರಿಯಾಗಿಸಿ ಸಿರಿಯಾ ಕಡೆಯಿಂದ ನಡೆಸಲಾಗಿದ್ದ ಆರು ರಾಕೆಟ್‌ ದಾಳಿಗೆ ಸೂಕ್ತ ಪ್ರತ್ಯುತ್ತರ ನೀಡಲಾಗಿದೆ ಎಂದು ಇಸ್ರೇಲ್‌ ಸೇನೆ ಭಾನುವಾರ ಹೇಳಿದೆ.

ಇದೇ ಮೊದಲ ಬಾರಿಗೆ ಇಂಥ ದಾಳಿ ನಡೆದಿದೆ. ಒಟ್ಟು ಎರಡು ಹಂತದಲ್ಲಿ ತಲಾ ಮೂರು ರಾಕೆಟ್‌ಗಳು ನುಗ್ಗಿ ಬಂದಿವೆ. ಈ ದಾಳಿಯಿಂದ ಯಾವುದೇ ಸಾವು ನೋವು ಉಂಟಾಗಿಲ್ಲ. ಇದಾದ ಕೆಲವೇ ಗಂಟೆಗಳಲ್ಲಿ ಸಿರಿಯಾ ಸೇನೆಯನ್ನು ಗುರಿಯಾಗಿಸಿಕೊಂಡು ಫಿರಂಗಿ ದಾಳಿ ನಡೆಸಲಾಗಿದೆ.

ಗಾಜಾ, ಲೆಬನಾನ್‌ಗಳಲ್ಲಿ ಕಳೆದ ಕೆಲದಿನಗಳಿಂದ ಉಂಟಾಗಿರುವ ಸಂಘರ್ಷ ಬಿಗಡಾಯಿಸಿರುವಂತೆಯೇ ಈ ಬೆಳವಣಿಗೆ ನಡೆದಿದೆ. ಶನಿವಾರ ಸಿರಿಯಾ ಕಡೆಯಿಂದ ನಡೆಸಲಾಗಿದ್ದ ಮೊದಲ ಹಂತದಲ್ಲಿ ಒಂದು ರಾಕೆಟ್‌ ಇಸ್ರೇಲ್‌ ನಿಯಂತ್ರಣ ಇರುವ ಗೋಲನ್‌ ಹೈಟ್ಸ್‌ ಎಂಬ ಸ್ಥಳದಲ್ಲಿ ಬಿದ್ದಿದೆ. ಮತ್ತೊಂದನ್ನು ಮಧ್ಯದಲ್ಲೇ ಛೇದಿಸಲಾಗಿತ್ತು. ಹೀಗಾಗಿ, ಅದು ಸಿರಿಯಾ ಗಡಿಗೆ ಹೊಂದಿಕೊಂಡು ಇರುವ ಜೋರ್ಡನ್‌ನ ನೆಲದಲ್ಲಿ ಬಿದ್ದಿದೆ.

ಡಮಾಸ್ಕಸ್‌ ಮೂಲದ ಪ್ಯಾಲೆಸ್ತೀನಿ ಪ್ರತ್ಯೇಕತಾವಾದಿ ಸಂಘಟನೆ ಅಲ್‌-ಕುಡ್ಸ್‌ ಬ್ರಿಗೇಡ್‌ ಈ ಕೃತ್ಯದ ಹೊಣೆ ಹೊತ್ತುಕೊಂಡಿದೆ.