ಐಎಸ್‌ಎಲ್‌ ಸೆಮೀಸ್‌: ಬೆಂಗಳೂರು ಎಫ್ ಸಿ ಗೆ ಸೋಲು

ಗುವಾಹಟಿ: ಇಲ್ಲಿನ ಇಂದಿರಾಗಾಂಧಿ ಅಥ್ಲೆಟಿಕ್ಸ್‌ ಕ್ರೀಡಾಂಗಣದಲ್ಲಿ ನಡೆದ ಇಂಡಿಯನ್‌ ಸೂಪರ್‌ ಲೀಗ್‌(ಐಎಸ್‌ಎಲ್‌) ಮೊದಲ ಲೆಗ್‌ ಸೆಮಿಫೈನಲ್‌ನಲ್ಲಿ ಬೆಂಗಳೂರು ಎಫ್ ಸಿ ತಂಡವನ್ನು 2-1 ಗೋಲುಗಳ ರೋಚಕ ಹೋರಾಟದಲ್ಲಿ ನಾರ್ಥ್ಈಸ್ಟ್‌ ಯುನೈಟೆಡ್‌ ತಂಡ ಪರಾಭವಗೊಳಿಸಿತು. ಇದರೊಂದಿಗೆ ಸುನಿಲ್‌ ಚೆಟ್ರಿ ನೇತೃತ್ವದ ಬೆಂಗಳೂರು ತಂಡದ ಮುಂದಿನ ಹಂತದ ಕನಸಿಗೆ ಆರಂಭಿಕ ವಿಘ್ನ ಎದುರಾಗಿದೆ.

ಗುರುವಾರ ನಡೆದ ಪಂದ್ಯದಲ್ಲಿ ನಾರ್ಥ್ಈಸ್ಟ್‌ ಯುನೈಟೆಡ್‌ ತಂಡ ಥ್ಲಾಂಗ್‌ ನೆರವಿನಿಂದ 20ನೇ ನಿಮಿಷದಲ್ಲಿ ಗೋಲು ಬಾರಿಸಿ 1-0 ಮುನ್ನಡೆ ಪಡೆದುಕೊಂಡಿತ್ತು.ಇದಕ್ಕೆ ಪ್ರತ್ಯುತ್ತರವಾಗಿ ಹೋರಾಟ ಪ್ರದರ್ಶಿಸಿದ ಬೆಂಗಳೂರು ಎಫ್ಸಿ, ಕ್ಸಿಕೊ ಹೆರ್ನಾಂಡೆಜ್‌ 82ನೇ ನಿಮಿಷದಲ್ಲಿ ದಾಖಲಿಸಿದ ಗೋಲಿನ ನೆರವಿನಿಂದ 1-1 ಗೋಲುಗಳ ಸಮಸಾಧಿಸಿಕೊಂಡಿತು. ಇನ್ನೇನು ಪಂದ್ಯ ಡ್ರಾದಲ್ಲಿ ಅಂತ್ಯಗೊಳ್ಳಲಿದೆ ಎಂದು ಅಂದುಕೊಳ್ಳುವಷ್ಟರಲ್ಲಿ ಜೂವಾನ್‌ ಮಸಿಯಾ ಗೋಲು (90 ಪ್ಲಸ್‌ 5 ನಿಮಿಷ)ಬಾರಿಸಿಯೇ ಬಿಟ್ಟರು. ನಾರ್ಥ್ಈಸ್ಟ್‌ ಅಚ್ಚರಿಯ ಗೆಲುವಿನ ಕೇಕೆ ಹಾಕಿತು.

ಮುಂಬರುವ ಸೆಮಿಫೈನಲ್‌ 1ರ ಲೆಗ್‌ ಎರಡರಲ್ಲಿ ಬೆಂಗಳೂರು ಎಫ್ಸಿ ಮತ್ತೂಂದು ಬಾರಿಗೆ ನಾರ್ಥ್ಈಸ್ಟ್‌ ಯುನೈಟೆಡ್‌ ತಂಡವನ್ನು ಎದುರಿಸಲಿದೆ. ಈ ಪಂದ್ಯ ಮಾ.11ರಂದು ಬೆಂಗಳೂರಿನ ಶ್ರೀಕಂಠೀರವ ಕ್ರೀಡಾಂಗಣ ದಲ್ಲಿ ನಡೆಯಲಿದೆ. ಈ ಪಂದ್ಯ ಬೆಂಗಳೂರು ಎಫ್ಸಿಗೆ ಮಾಡು ಇಲ್ಲವೆ ಮಡಿ ಪಂದ್ಯ. ಈ ಪಂದ್ಯದಲ್ಲಿ ಗೆದ್ದರಷ್ಟೇ ಬೆಂಗಳೂರು ಮುಂದಿನ ಹಂತಕ್ಕೆ ಏರುವ ಕನಸನ್ನು ಕಾಣಬಹುದು.