ಸ್ಮಿತ್‌, ಆರ್ಚರ್‌, ಬಟ್ಲರ್‌ ಫ‌ಲಿತಾಂಶ ನೆಗೆಟಿವ್‌

ದುಬಾೖ: ಇಂಗ್ಲೆಂಡಿನಲ್ಲಿ ಏಕದಿನ ಸರಣಿ ಪೂರೈಸಿ ಐಪಿಎಲ್‌ ಆಡಲು ಯುಎಇಗೆ ಆಗಮಿಸಿದ ಕ್ರಿಕೆಟಿಗರ 36 ಗಂಟೆಗಳ ಕ್ವಾರಂಟೈನ್‌ ಅವಧಿ ಮುಗಿದಿದೆ. ಈ ಅವಧಿಯಲ್ಲಿ ನಡೆಸಲಾದ ಇವರೆಲ್ಲರ ಕೋವಿಡ್‌-19 ಟೆಸ್ಟ್‌ ಫ‌ಲಿತಾಂಶ ನೆಗೆಟಿವ್‌ ಬಂದಿದೆ. ಎಲ್ಲರೂ ತಮ್ಮ ತಂಡಗಳ ಪ್ರಥಮ ಪಂದ್ಯದ ಆಯ್ಕೆಗೆ ಲಭ್ಯರಾಗಲಿದ್ದಾರೆ.

ಸ್ಟೀವನ್‌ ಸ್ಮಿತ್‌, ಜಾಸ್‌ ಬಟ್ಲರ್‌ ಮತ್ತು ಜೋಫ್ರ ಆರ್ಚರ್‌ ಶುಕ್ರವಾರ ಕೋವಿಡ್‌-19 ಟೆಸ್ಟ್‌ಗೆ ಒಳಗಾಗಿದ್ದರು. ಇವರೆಲ್ಲರ ಫ‌ಲಿತಾಂಶವೂ ನೆಗೆಟಿವ್‌ ಬಂದಿದೆ ಎಂಬುದಾಗಿ ಐಪಿಎಲ್‌ ಮೂಲವೊಂದು ತಿಳಿಸಿದೆ.

ಇವರಲ್ಲಿ ಸ್ಟೀವನ್‌ ಸ್ಮಿತ್‌ ಏಕದಿನ ಸರಣಿ ವೇಳೆ ಸಮಸ್ಯೆ ಎದುರಿಸಿದ್ದರು. ಇದರಿಂದ ಸರಣಿಯ ಮೂರೂ ಪಂದ್ಯಗಳಿಂದ ಹೊರಗುಳಿದಿದ್ದರು. ಕೋವಿಡ್‌ ಟೆಸ್ಟ್‌ನಲ್ಲಿ ತೇರ್ಗಡೆಯಾದ ಕಾರಣ ಅವರಿಗೆ “ಬಿಗ್‌ ರಿಲೀಫ್’ ಸಿಕ್ಕಿದಂತಾಗಿದೆ. ಅವರು ರಾಜಸ್ಥಾನ್‌ ರಾಯಲ್ಸ್‌ ತಂಡದ ನಾಯಕರಾಗಿದ್ದಾರೆ. ಅಕಸ್ಮಾತ್‌ ಮೊದಲ ಪಂದ್ಯದಿಂದ ಹೊರಗುಳಿದರೆ ಆಗ ಜಾಸ್‌ ಬಟ್ಲರ್‌ ತಂಡವನ್ನು ಮುನ್ನಡೆಸಲಿದ್ದಾರೆ.