ನಾಯಿ ಬದಲು ತಾವೇ ಕಚ್ಚಿಕೊಂಡರು!

ನಾಯಿಗಳು ಕಚ್ಚುವುದು ಸಾಮಾನ್ಯ. ಆದರೆ ಜರ್ಮನಿಯಲ್ಲಿ ನಾಯಿ ವಿಚಾರದಲ್ಲಿ ಇಬ್ಬರು ಮಹಿಳೆಯರೇ ಪರ ಸ್ಪರ ಕಚ್ಚಿಕೊಂಡಿದ್ದಾರೆ!

51 ವರ್ಷದ ಮಹಿಳೆಯೊಬ್ಬಳು ತಾನೇ ಸಾಕಿದ್ದ ನಾಯಿ ಏನೋ ತಪ್ಪು ಮಾಡಿತೆಂದು ಅದಕ್ಕೆ ಥಳಿಸುತ್ತಿದ್ದಳಂತೆ. ಅಲ್ಲೇ ಪಕ್ಕದಲ್ಲಿ 27 ವರ್ಷದ ಮಹಿಳೆ ನಾಯಿಯನ್ನು ವಾಕಿಂಗ್‌ ಕರೆದುಕೊಂಡು ಹೋಗುತ್ತಿದ್ದು, ಆ ದೃಶ್ಯವನ್ನು ಕಂಡವಳೇ ನಾಯಿಗೆ ಹೊಡೆಯುತ್ತಿದ್ದ ಮಹಿಳೆಯ ಬಳಿ ಬಂದು ನಾಯಿಗೆ ಹೊಡೆಯಬೇಡ ಎಂದಿದ್ದಾಳೆ.

ಮಾತಿಗೆ ಮಾತು ಬೆಳೆದು, ಇಬ್ಬರೂ ಕೈ ಕೈ ಮಿಲಾಯಿಸಿಕೊಂಡಿದ್ದಾರೆ. ಆಗ ನಾಯಿಗೆ ಹೊಡೆಯುತ್ತಿದ್ದ ಮಹಿಳೆ ಕೆಳಗೆ ಬಿದ್ದಿದ್ದಾಳೆ.

ಸಿಟ್ಟಿನಿಂದ ಆಕೆ, 27 ವರ್ಷದವಳ ಕಾಲನ್ನೇ ಕಚ್ಚಿದ್ದಾಳೆ. ಅಲ್ಲೇ ನಿಂತಿದ್ದ ಎರಡು ನಾಯಿಗಳು ತಮ್ಮ ಮಾಲಕಿಯರು ಈ ರೀತಿ ಕಚ್ಚಾಡುವುದನ್ನು ನೋಡಿ ದಂಗಾಗಿವೆ.