ಭಾರತ-ಪಾಕ್‌ ನಡುವೆ ಸ್ಥಗಿತಗೊಂಡಿದ್ದ ಸೇವೆ : ಅಂಚೆ ಸಂಬಂಧ ಪುನಃ ಸ್ಥಾಪನೆ

ಲುಧಿಯಾನಾ: ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡಿದ್ದನ್ನು ರದ್ದು ಮಾಡಿದ್ದನ್ನು ಖಂಡಿಸಿ ಪಾಕಿಸ್ತಾನ ಮೂರು ತಿಂಗಳ ಹಿಂದೆ ಸ್ವಯಂ ಪ್ರೇರಿತವಾಗಿ ಭಾರತದ ಜತೆಗೆ ಇದ್ದ ಅಂಚೆ ಸಂಬಂಧ ಕಡಿದುಕೊಂಡಿತ್ತು. ಇದೀಗ ವಾಘಾ ಗಡಿಯ ಮೂಲಕ ಆಂಶಿಕವಾಗಿ ಸಾಮಾನ್ಯ ಅಂಚೆ ಸೇವೆ ಮತ್ತು ಎಕ್ಸ್‌ಪ್ರೆಸ್‌ ಮೈಲ್‌ ಸೇವೆಗಳು ಶುರುವಾಗಿವೆ. ಮೂರು ದಿನಗಳ ಹಿಂದೆ ಈ ಬಗ್ಗೆ ಪಾಕಿಸ್ಥಾನದ ಅಂಚೆ ಇಲಾಖೆ ಆದೇಶ ಹೊರಡಿಸಿತ್ತು. ಆದರೆ ಪಾರ್ಸೆಲ್‌ ಮತ್ತು ಇತರ ಅಂಚೆ ಸೇವೆಗಳು ಎರಡು ದೇಶಗಳ ನಡುವೆ ಶುರುವಾಗಿಲ್ಲ.

ಪಾಕಿಸ್ಥಾನ ಆಂಶಿಕವಾಗಿ ಅಂಚೆ ಸೇವೆ ಶುರು ಮಾಡಿದ್ದಕ್ಕೆ ಪ್ರತಿಯಾಗಿ ವಿದೇಶಾಂಗ ಇಲಾಖೆ ಕೂಡ ಭಾರತದ ವತಿಯಿಂದ ಅಂಚೆ ಸೇವೆಗಳನ್ನು ಪುನರಾರಂಭಿಸುವುದರ ಬಗ್ಗೆ ಹಸಿರು ನಿಶಾನೆ ತೋರಿಸಿದೆ. ಭಾರತೀಯ ಅಂಚೆಯ ಇಲಾಖೆಯ ಅಂತಾರಾಷ್ಟ್ರೀಯ ವಿಭಾಗದ ಉಪ ಮಹಾನಿರ್ದೇಶಕ ತನ್ವೀರ್‌ ಖಮರ್‌ ಮೊಹಮ್ಮದ್‌ ಕೂಡ ಈ ಬೆಳವಣಿಗೆಯನ್ನು ಖಚಿತಪಡಿಸಿದ್ದಾರೆ.

ಪಾಕಿಸ್ಥಾನ ಸೇವೆ ಮತ್ತೆ ಆರಂಭಿಸಿದ್ದು ಮಾಧ್ಯಮಗಳ ಮೂಲಕ ಗೊತ್ತಾಗಿದೆ. ಹೀಗಾಗಿ ಭಾರತದ ವತಿಯಿಂದಲೂ ಪೂರಕ ಕ್ರಮಗಳನ್ನು ಕೈಗೊಳ್ಳ ಲಾಗುತ್ತದೆ ಎಂದರು. ಮೂರು ತಿಂಗಳ ಅವಧಿಯಲ್ಲಿ ಪಾಕಿಸ್ಥಾನಕ್ಕೆ ಕಳುಹಿಸಬೇಕಾಗಿದ್ದ ಪತ್ರಗಳನ್ನು ಕಳುಹಿಸಲು ಕ್ರಮ ಕೈಗೊಳ್ಳುತ್ತೇವೆ ಎಂದು ಹೇಳಿದ್ದಾರೆ.