ಒಂದೇ ನಂಬರಿನಿಂದ 20 ಕೋಟಿ ಸ್ಪ್ಯಾಮ್‌ ಕರೆ! ಟ್ರೂಕಾಲರ್‌ ವರದಿಯಲ್ಲಿ ಬಯಲು

ನವದೆಹಲಿ: ಒಂದು ದಿನದಲ್ಲಿ ನೀವು ಎಷ್ಟು ಕರೆ ಮಾಡಬಹುದು? ಹತ್ತಿರಿಂದ 20 ಎಂದುಕೊಳ್ಳಬಹುದು. ಆದರೆ ನಮ್ಮ ದೇಶದಲ್ಲಿ ಒಂದು ಸ್ಪ್ಯಾಮ್‌ ನಂಬರ್‌ ಈ ವರ್ಷಾರಂಭದಿಂದ ಅಕ್ಟೋಬರ್‌ವರೆಗೆ ಬರೋಬ್ಬರಿ 20.20 ಕೋಟಿ ಕರೆ ಮಾಡಿದೆ.

ಟ್ರೂಕಾಲರ್‌ ಬಿಡುಗಡೆ ಮಾಡಿರುವ ವರದಿಯಿಂದ ಈ ಅಂಶ ಬೆಳಕಿಗೆ ಬಂದಿದೆ.

ಅದೊಂದೇ ಸಂಖ್ಯೆಯಿಂದ ಪ್ರತಿದಿನ 6.64 ಲಕ್ಷ ಕರೆ ಹೋಗುತ್ತಿದೆ. ಗಂಟೆಗೆ 27000 ಮಂದಿಗೆ ಕರೆ ಹೋಗುತ್ತಿದೆ. ಸಾಮಾನ್ಯವಾಗಿ ಸ್ಪ್ಯಾಮ್‌ ಸಂಖ್ಯೆಗಳನ್ನು ಪತ್ತೆ ಹಚ್ಚಿ ಅದನ್ನು ಬ್ಲಾಕ್‌ ಮಾಡುವ ಕೆಲಸವನ್ನು ಟ್ರೂಕಾಲರ್‌ ಮಾಡುತ್ತದೆಯಾದರೂ ಈ ಸಂಖ್ಯೆಯ ಮೂಲವನ್ನು ಪತ್ತೆ ಹಚ್ಚುವುದಕ್ಕೆ ಸಾಧ್ಯವಾಗಿಲ್ಲ ಎಂದು ಹೇಳಲಾಗಿದೆ.

ಇದನ್ನೂ ಓದಿ:ವ್ಯಕ್ತಿಯನ್ನು ಕೊಂದು ಗ್ರಾಮದಲ್ಲೇ ಹೂತಿಟ್ಟರು : ಮೂರು ದಿನಗಳ ಬಳಿಕ ಪ್ರಕರಣ ಬೆಳಕಿಗೆ

ಸ್ಪ್ಯಾಮ್‌ ಕರೆ: ಭಾರತ ನಂ.4
ಜನಸಾಮಾನ್ಯರು ಅತಿ ಹೆಚ್ಚು ಸ್ಪ್ಯಾಮ್‌ ಕರೆ ಸ್ವೀಕರಿಸುವ ದೇಶವೆಂದರೆ ಅದು ಬ್ರೆಜಿಲ್‌. ಅಲ್ಲಿ ಪ್ರತಿ ಮೊಬೈಲ್‌ಗೆ ತಿಂಗಳಿಗೆ ಸರಾಸರಿ 32.9 ಸ್ಪ್ಯಾಮ್‌ ಕರೆಗಳು ಬರುತ್ತವೆಯಂತೆ.

ಈ ಪಟ್ಟಿಯಲ್ಲಿ ಪೆರು ಎರಡನೇ ಸ್ಥಾನದಲ್ಲಿದೆ. ನಾಲ್ಕನೇ ಸ್ಥಾನದಲ್ಲಿ ಭಾರತವಿದ್ದು, ದೇಶದಲ್ಲಿ ಪ್ರತಿ ತಿಂಗಳಿಗೆ ಮೊಬೈಲ್‌ ಒಂದಕ್ಕೆ ಸರಾಸರಿ 17 ಸ್ಪ್ಯಾಮ್‌ ಕರೆಗಳು ಬರುತ್ತವೆಯಂತೆ. ಭಾರತದಲ್ಲಿ ಸ್ಪ್ಯಾಮ್‌ ಸಂಖ್ಯೆಗಳ ಮೊದಲ ಸಾಲಿನಲ್ಲಿ ಟೆಲಿ ಮಾರ್ಕೆಟಿಂಗ್‌ ಸಂಸ್ಥೆಗಳಿವೆ ಎಂದು ವರದಿ ತಿಳಿಸಿದೆ.