ಯು-17 ಮಹಿಳಾ ಫುಟ್‌ಬಾಲ್‌ ಕೋಚ್‌ ಅಮಾನತು

ಹೊಸದಿಲ್ಲಿ: ಲೈಂಗಿಕ ಕಿರುಕುಳ ಪ್ರಕರಣವೊಂದರಲ್ಲಿ ಭಾರತೀಯ ಸೈಕ್ಲಿಂಗ್‌ ಒಕ್ಕೂಟದ ಕೋಚ್‌ ಆರ್‌.ಕೆ. ಶರ್ಮ ಅವರನ್ನು ಹೊರಹಾಕಿದ ವಿದ್ಯಮಾನ ಮಾಸುವ ಮೊದಲೇ ಭಾರತದ ಅಂಡರ್‌-17 ಮಹಿಳಾ ಫ‌ುಟ್‌ಬಾಲ್‌ ತಂಡದ ಕೋಚ್‌ ಒಬ್ಬರನ್ನು ಅಮಾನತು ಮಾಡಿ, ದೇಶಕ್ಕೆ ಕರೆಸಿಕೊಳ್ಳಲಾಗಿದೆ.

ಸದ್ಯ ತರಬೇತಿಗಾಗಿ ನಾರ್ವೆಯಲ್ಲಿದ್ದ ತಂಡದ ಅಪ್ರಾಪ್ತ ವಯಸ್ಕ ಆಟಗಾರ್ತಿಯೊಬ್ಬರೊಂದಿಗೆ ಕೋಚ್‌ ತಪ್ಪಾಗಿ ನಡೆದುಕೊಂಡಿದ್ದಾರೆ. ಇದನ್ನು ಗಂಭೀರವಾಗಿ ಪರಿಗಣಿಸಿದ ಎಐಎಫ್ಎಫ್ ಆಡಳಿತಾಧಿಕಾರಿಗಳು (ಸಿಒಎ) ಕೂಡಲೇ ಕ್ರಮ ಕೈಗೊಂಡಿದ್ದಾರೆ.

ಈ ವಿಷಯವನ್ನು ಭಾರತೀಯ ಕ್ರೀಡಾ ಪ್ರಾಧಿಕಾರದ (ಸಾಯ್‌) ಗಮನಕ್ಕೂ ತರಲಾಗಿದೆ. ಸಂಬಂಧಪಟ್ಟ ವ್ಯಕ್ತಿ ಭಾರತೀಯ ಫ‌ುಟ್‌ಬಾಲ್‌ ತಂಡದ ಯಾವುದೇ ಸದಸ್ಯರನ್ನು ಮಾತನಾಡಿಸಬಾರದೆಂದು ತಾಕೀತು ಮಾಡಲಾಗಿದೆ. ವಿಚಾರಣೆಗೆ ನೇರವಾಗಿ ಹಾಜರಾಗಬೇಕೆಂದು ಕಟುವಾಗಿ ಸೂಚಿಸಿದೆ.

ಸದ್ಯ ಭಾರತ ಮಹಿಳಾ ತಂಡ ಯೂರೋಪ್‌ ಪ್ರವಾಸದಲ್ಲಿದೆ. ಮುಂದಿನ ಅಂಡರ್‌-17 ಮಹಿಳಾ ವಿಶ್ವಕಪ್‌ ಹಿನ್ನೆಲೆಯಲ್ಲಿ ಯೂರೋಪ್‌ನ ವಿವಿಧ ದೇಶಗಳಲ್ಲಿ ತರಬೇತಿ ಪಡೆಯಲಿದೆ. ವಿಶ್ವಕಪ್‌ ಅ. 11ರಿಂದ 30ರ ವರೆಗೆ ಭಾರತದಲ್ಲೇ ನಡೆಯಲಿದೆ.