ಲಂಡನ್‌ : ನಿದ್ದೆಗಣ್ಣಲ್ಲಿ ಕಾರ್‌ ಡ್ರೈವ್‌ ಮಾಡಿ ಅಪಘಾತ: ಭಾರತೀಯ ಮಹಿಳೆಗೆ ಜೈಲು

ಲಂಡನ್‌ : ನಿದ್ದೆಗಣ್ಣಿನಲ್ಲಿ ಕಾರು ಚಲಾಯಿಸಿ ಇನ್ನೊಂದು ಕಾರಿಗೆ ಢಿಕ್ಕಿ ಹೊಡೆದು ಅದರ ಚಾಲಕನ ಸಾವಿಗೆ ಕಾರಣಳಾದ ಭಾರತೀಯ ಮೂಲದ ಮಹಿಳೆಗೆ ಎರಡೂವರೆ ವರ್ಷದ ಜೈಲು ಶಿಕ್ಷೆ ವಿಧಿಸಲಾಗಿದೆ.

41 ವರ್ಷದ ಅನುಷಾ ರಂಗನಾಥನ್‌ ಟೆಕ್‌ ಪರಿಣತೆ. ವೃತ್ತಿ ನಿಮಿತ್ತ ಆಕೆ ಕೆಲವು ದಿನಗಳಿಂದ ನಿದ್ದೆಯೇ ಮಾಡಿರಲಿಲ್ಲ; ಮೇಲಾಗಿ ವಿಪರೀತ ಆಯಾಸಕ್ಕೆ ಗುರಿಯಾಗಿದ್ದಳು. ಆ ಸ್ಥಿತಿಯಲ್ಲಿ ಆಕೆ ತನ್ನ ಮಗುವನ್ನು ಕಾರಿನಲ್ಲಿರಿಸಿಕೊಂಡು ನಿದ್ದೆಗಣ್ಣಲ್ಲೇ ಡ್ರೈವ್‌ ಮಾಡುತ್ತಿದ್ದಳು.

ಆಗ್ನೇಯ ಇಂಗ್ಲಂಡ್‌ನ‌ ಆಕ್ಸ್‌ಫ‌ರ್ಡ್‌ಶಯರ್‌ ನಲ್ಲಿ ಆಕೆಯ ಕಾರು ಇನ್ನೊಂದು ಕಾರಿಗೆ ಗುದ್ದಿ ಅದರ ಚಾಲಕ 70ರ ಹರೆಯದ ಪ್ಯಾಟ್ರಿಶಿಯಾ ರಾಬಿನ್‌ಸನ್‌ ಅವರ ಸಾವಿಗೆ ಕಾರಣಳಾಗಿದ್ದಳು. ಈ ಘಟನೆ ಕಳೆದ ವರ್ಷ ಜುಲೈ ನಲ್ಲಿ ನಡೆದಿತ್ತು.

ತನ್ನ ಅಪರಾಧವನ್ನು ಒಪ್ಪಿಕೊಂಡ ಅನುಷಾಗೆ ಆಕ್ಸ್‌ಫ‌ರ್ಡ್‌ ಕ್ರೌನ್‌ ಕೋರ್ಟ್‌ ಎರಡೂವರೆ ವರ್ಷ ಜೈಲು ಶಿಕ್ಷೆ ವಿಧಿಸಿತು.