ವಿಶ್ವದ ಅತಿ ಬುದ್ಧಿವಂತೆ ಬಾಲಕಿ ಭಾರತ ಮೂಲದ ನತಾಶಾ

ವಾಷಿಂಗ್ಟನ್‌: ಚೆನ್ನೈ ಮೂಲದ ಅಮೆರಿಕನ್‌ ಬಾಲಕಿ ನತಾಶಾ ಪೆರಿಯನಾಯಗಮ್‌ ಸತತ 2ನೇ ಬಾರಿಗೆ ವಿಶ್ವದ ಅತ್ಯಂತ ಬುದ್ಧಿಶಾಲಿ ವಿದ್ಯಾರ್ಥಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.

ಅಮೆರಿಕದ ಜಾನ್‌ ಹಾಪ್ಕಿನ್ಸ್ ಸೆಂಟರ್‌ ಫಾರ್‌ ಟ್ಯಾಲೆಂಟೆಡ್‌ ಯೂಥ್‌ ಎಂಬ ಸಂಸ್ಥೆ ನಡೆಸುವ ಪರೀಕ್ಷೆಯಲ್ಲಿ ಈಕೆ ಅದ್ಭುತ ಸಾಧನೆ ಮಾಡಿದ್ದಾರೆ.

13 ವರ್ಷದ ನತಾಶಾ ನ್ಯೂಜೆರ್ಸಿಯ ಎಂ.ಗಾಡಿನೀರ್‌ ಮಾಧ್ಯಮಿಕ ಶಾಲೆಯಲ್ಲಿ ಓದುತ್ತಿದ್ದಾರೆ. ಜಾನ್‌ ಹಾಪ್ಕಿನ್ಸ್ ನಡೆಸುವ ಪರೀಕ್ಷೆಯಲ್ಲಿ ವಿಶ್ವದ 76 ರಾಷ್ಟ್ರಗಳ 15,000ಕ್ಕೂ ಅಧಿಕ ವಿದ್ಯಾರ್ಥಿಗಳು ಪಾಲ್ಗೊಳ್ಳುತ್ತಾರೆ.

2021-22ರ ಸಾಲಿನಲ್ಲಿ 5ನೇ ತರಗತಿಯಲ್ಲಿದ್ದ ಈಕೆ 8ನೇ ತರಗತಿ ಮಟ್ಟದ ಪರೀಕ್ಷೆಯಲ್ಲಿ ಅದ್ಭುತ ಸಾಧನೆ ಮಾಡಿದ್ದರು. ಈ ವರ್ಷ ಈಕೆ ಸ್ಯಾಟ್‌, ಆ್ಯಕ್ಟ್, ಶಾಲೆ ಮತ್ತು ಕಾಲೇಜುಮಟ್ಟದ ಸಾಮರ್ಥ್ಯ ಪರೀಕ್ಷೆಯಲ್ಲಿ ತಮ್ಮ ಶಕ್ತಿಯನ್ನು ತೋರಿದ್ದಾರೆ.