ಹಾಕಿ ಸರಣಿ: ಭಾರತಕ್ಕೆ 1-4 ಸೋಲು

ಅಡಿಲೇಡ್‌: ನಾಯಕ ಹರ್ಮನ್‌ಪ್ರೀತ್‌ ಸಿಂಗ್‌ ಅವಳಿ ಗೋಲು ದಾಖಲಿಸಿದರೂ ಭಾರತ ತಂಡವು ಭಾನುವಾರ ನಡೆದ ಹಾಕಿ ಸರಣಿಯ ಐದನೇ ಪಂದ್ಯದಲ್ಲಿ 4-5 ಗೋಲುಗಳಿಂದ ಸೋಲನ್ನು ಕಂಡಿತು. ಈ ಮೂಲಕ ವಿಶ್ವದ ನಂಬರ್‌ ವನ್‌ ತಂಡದೆದುರು ನಡೆದ ಐದು ಪಂದ್ಯಗಳ ಹಾಕಿ ಸರಣಿಯನ್ನು ಭಾರತ 1-4 ಅಂತರದಿಂದ ಕಳೆದುಕೊಂಡಿತು.

ಟಾಮ್‌ ವಿಖಮ್‌ ಎರಡನೇ ಮತ್ತು 17ನೇ ನಿಮಿಷದಲ್ಲಿ ಗೋಲು ಹೊಡೆದಿದ್ದರೆ ಅರನ್‌ ಜಲೆವಿಸ್ಕಿ (30ನೇ), ಜಾಕಬ್‌ ಆ್ಯಂಡರ್ಸನ್‌ (40ನೇ) ಮತ್ತು ಜ್ಯಾಕ್‌ ವೆಟನ್‌ 54ನೇ ನಿಮಿಷದಲ್ಲಿ ಗೋಲು ಹೊಡೆದಿದ್ದರು. ಭಾರತದ ಪರ ಹರ್ಮನ್‌ಪ್ರೀತ್‌ 24ನೇ ಮತ್ತು 60ನೇ ನಿಮಿಷದಲ್ಲಿ ಗೋಲು ಹೊಡೆದಿದ್ದರೆ ಅಮಿತ್‌ ರೋಹಿದಾಸ್‌ 34ನೇ ಮತ್ತು ಸುಖ್‌ಜೀತ್‌ ಸಿಂಗ್‌ 55ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ್ದರು.

ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ಭಾರತ 4-5  ಮತ್ತು 4-7 ಗೋಲುಗಳಿಂದ ಸೋಲನ್ನು ಕಂಡಿದ್ದರೆ ಮೂರನೇ ಪಂದ್ಯವನ್ನು 4-3 ಅಂತರದಿಂದ ಜಯಿಸಿತ್ತು. ಆದರೆ ನಾಲ್ಕನೇ ಪಂದ್ಯದಲ್ಲಿ ಭಾರತ ಮತ್ತೆ 1-5ರಿಂದ ಸೋಲನ್ನು ಕಂಡಿತ್ತು. ಐದನೇ ಪಂದ್ಯದಲ್ಲಿ ಸೋತಿದ್ದರೂ ತೀವ್ರ ಪೈಪೋಟಿಯ ಹೋರಾಟ ನೀಡಿತ್ತು.

ಈ ಪಂದ್ಯದಲ್ಲಿ ಆಸ್ಟ್ರೇಲಿಯ ಪ್ರಬಲ ಹೋರಾಟ ನೀಡಿತ್ತು. ಹೆಚ್ಚಿನ ಸಮಯ ಚೆಂಡಿನ ನಿಯಂತ್ರಣ ಸಾಧಿಸಿದ್ದ ಆಸ್ಟ್ರೇಲಿಯ ಎರಡನೇ ನಿಮಿಷದಲ್ಲಿ ಗೋಲು ಖಾತೆ ತೆರೆಯಿತು. ಟಾಮ್‌ ವಿಖಮ್‌ ಬಲವಾಗಿ ಹೊಡೆದು ಗೋಲು ಖಾತೆ ತೆರೆದರು. ವಿಖಮ್‌ ಮತ್ತೆ 17ನೇ ನಿಮಿಷದಲ್ಲಿ ಇನ್ನೊಂದು ಗೋಲು ಹೊಡೆದು ಮುನ್ನಡೆಯನ್ನು 2ಕ್ಕೇರಿಸಿದರು. ಆಬಳಿಕ ಭಾರತೀಯ ಆಟಗಾರರೂ ಆಕ್ರಮಣಕಾರಿ ಆಟಕ್ಕೆ ಮುಂದಾದರು.