ಆಟೊಮೊಬೈಲ್‌: ಮೂರನೇ ಸ್ಥಾನಕ್ಕೆ ಏರಿದ ಭಾರತ

ನವದೆಹಲಿ: ಆಟೊಮೊಬೈಲ್‌ ಮಾರುಕಟ್ಟೆಯಲ್ಲಿ ಭಾರತ ಜಪಾನ್‌ ಅನ್ನು ಹಿಂದಿಕ್ಕುವ ಮೂಲಕ ಮೂರನೇ ಸ್ಥಾನಕ್ಕೆ ಏರಿದೆ. ವರದಿಗಳ ಪ್ರಕಾರ, ಕಳೆದ ವರ್ಷ ಭಾರತದಲ್ಲಿ ಒಟ್ಟು 4.25 ಮಿಲಿಯನ್‌ ಹೊಸ ವಾಹನಗಳು ಮಾರಾಟವಾಗಿವೆ. ಇದೇ ವರ್ಷ ಜಪಾನ್‌ನಲ್ಲಿ 4.2 ಮಿಲಿಯನ್‌ ವಾಹನಗಳು ಮಾರಾಟವಾಗಿವೆ.

ಸೊಸೈಟಿ ಆಫ್ ಇಂಡಿಯನ್‌ ಆಟೊಮೊಬೈಲ್‌ ಮ್ಯಾನುಫ್ಯಾಕ್ಚರರ್ ಬಿಡುಗಡೆಗೊಳಿಸಿದ ಡೇಟಾ ಪ್ರಕಾರ, 2022ರ ಜನವರಿಯಿಂದ ನವೆಂಬರ್‌ವರೆಗೆ ಭಾರತದಲ್ಲಿ ಒಟ್ಟು 4.13 ಮಿಲಿಯನ್‌ ಹೊಸ ವಾಹನಗಳು ಮಾರಾಟವಾಗಿವೆ. ಡಿಸೆಂಬರ್‌ ಸೇಲ್ಸ್‌ ಗಮನಿಸಿದರೆ ಈ ಸಂಖ್ಯೆಯು 4.25 ಮಿಲಿಯನ್‌ಗೆ ತಲುಪಿದೆ. ಈ ಡೇಟಾದಲ್ಲಿ ವಾಣಿಜ್ಯ ವಾಹನಗಳ ಮಾರಾಟ ಸೇರ್ಪಡೆಯಾಗಿಲ್ಲ. ಟಾಟಾ ಮೋಟರ್ ಮತ್ತು ಇತರೆ ಕಂಪನಿಗಳು ಇನ್ನೂ ವಾಣಿಜ್ಯ ವಾಹನಗಳ ಮಾರಾಟದ ಮಾಹಿತಿ ಬಿಡುಗಡೆ ಮಾಡಿಲ್ಲ.

ನಂಬರ್‌ ಒನ್‌ ಸ್ಥಾನದಲ್ಲಿ ಚೀನ ಮುಂದುವರಿದಿದ್ದು, ಕಳೆದ ವರ್ಷ ಆ ದೇಶದಲ್ಲಿ 26.27 ಮಿಲಿಯನ್‌ ಹೊಸ ವಾಹನಗಳು ಮಾರಾಟವಾಗಿವೆ. 15.4 ಮಿಲಿಯನ್‌ ವಾಹನಗಳ ಮಾರಾಟ ಆಗಿರುವ ಅಮೆರಿಕವು ಎರಡನೇ ಸ್ಥಾನದಲ್ಲಿದೆ.